Wekîla HDPyî ya Agirî Dîlane Dîrayet Taşdemîr vist vîrî ke Qirkerdişê Parisî wextê prosesê çareserîye de ame kerdene û îfade kerd ke no tesadufî nîyo. 

Taşdemîre vat: ''No qirkerdiş pê agahî û înîsîyatîfê xeylêk hêzan ame kerdene. Coka no serebûto ke merkezê Ewropa de ame kerdene bi temamî nêame eşkerakerdene. Qeydê vengan û dokumenteran ra fam beno ke qirkerdiş hetê MÎTî ra ameyo kerdene. Rixmê na raştîye zî ê wazenê serebût mîyan bikerê.''

Taşdemîre da zanayene ke Qirkerdişê Parisî heman wextî de vera çareserîya demokratîke ya meseleya kurdan provakasyonêk bi û vat: ''Aqlê dewlete seba çareserîya meseleya kurdan reya verêne rayîr û metodêko newe ceribnabi. Pê têkoşîn û israrê Birêz Ocalanî dewlete game eştbî.  Qalo ke no qirkerdiş plan kerd hema zî aktîf o.''

Taşdemîre qiseykerdişê xo wina dewam kerd: ''Sakîne Cansiz warê polîtîkî û têkoşînê azadîye yê cinîyan de isrardar bîye. Têkoşînê cinîyan hema zî dinya rê tesîr keno. Coka têkoşîno ke bi keda nê 3 cinîyan awan bîyo, tarîxî yo. Ganî cinîyî nê qirkerdişî sey hêrişê vera nasnameyê cinîyan bivînê. 4ê çeleyê 2016î de zî Silopî de Sêvê Demîr, Fatma Uyar û Pakîze Nayir ameybî qetilkerdene. Vera nasnameyê cinîyan, vera rûmetê cinîyan polîtîkayêka taybete yena caardene. Êyê ke vera na polîtîka şer kerd bîyî hedef.''

Taşdemîre bale ante ser ke xîretê nimnayîşê Qirkerdişê Parisî dişmenîya kurdan ra yo û vat: ''Dokument û delîlî mojnenê ke no qirkerdiş hetê hêzanê mîyanneteweyîyan ra ame peygoşkerdene.  Cinîyê kurdî do têkoşînê xo dewam bikerê. Ruh û xeta xoverdayîşî pê qerardarî dewam kenê.''