9ê temmuze de dewa Marînî ya qezaya Nisêbînî ya Mêrdînî de leşkeranê tirkan dewijî tacîz kerdbî û nînan rê îşkence kerdbî.

Platformê Cinîyan ê Şahmarane yê Mêrdînî derheqê tacîz û îşkenceyê leşkeran de vizêr Parka Karayollariyî de eşkerayîyêke daye.

Nameyê platformî ser o Gulîzare Îpek eşkerayîye wende. Gulîzare îfade kerd ke Vakurê Kurdîstanî de bi destê leşker û polîsanê tirkan sûcê vera merdimatîye zêdîyenê û vat: ''Faturaya şerî ya 8 serra cinî û domanan rê birîyena. Kolonyalîzm, şer, rant, înkar, îmha, asîmîlasyon, bênasnameverdayîş, bêvîr verdayîş rojêke zî Kurdîstanî ra kêm nêbîyê. 

Îşkence Kurdîstan de bîyo rewşêka rûtîne. Leşkeran eşt dewa Marînî ser, cinî û domanî taxî kerdî û dewijan rê îşkence kerd. Ganî Serdozgerîya Komare ya Nisêbînî derheqê nê leşkeran de cade tehqîqat abikera. Ma wazenê ke faîlanê tacîzker, tecawuzker û îşkencekeran muhakeme bibê. Ma do destûr nêdê ke welatê ma de tacîz, tecawuz û îşkenceyî bêrê meşrûkerdene.''

Eşkerayîye bi slogananê sey ''Jin, Jiyan, Azadî'' qedîyaye.