Endama Heyetê Rayberdişî yê Komeleya Cinîyan a Rosa Fîlîze ANFyî rê zêdîyayîşê cînayetanê cinîyan ercna.

Fîlîze pare kerd ke îqtîdarê AKP-MHPyî her warî de dişmenîya cinîyan keno û nêwazeno cinîyî tewrê cuya komelkîye bibê. Fîlîze vat: ''Ma nê sîstemê kanwazî qebul nêkenê. Ma sey cinîyan mojnenê ke bi têkoşînê xo est ê. Cinîyî hinî nêwazenê xizmetê camêrdan bikerê û wazenê bi azadî biciwîyê.''

Fîlîze ard ziwan ke rîyê polîtîkaya bêcezaverdayîşî ya dewlete ra serebûtê kişîyayîşê cinîyan zêdîyenê. Fîlîze vat: ''Îqtîdar derheqê sûcanê hêrişanê cînsîyan û kişîyayîşê cinîyan de cezayanê bitesîran ferz nêkeno. Prosesê korona de zafê tecawuzkerî û kiştoxî vera dîyabî. No mojneno ke dewlete paştî dana kerdişanê camêrdan. Şirnex de çawişêkê pisporî cinîyêke tacîz kerde û şarê Şirnexî vera çawişî metodê xopawitişî şuxilna. Kerdox karî ra ame girewtene û tepişîya. La ganî ma bi ney bese nêkerê. Ganî cezayî bizêdîyê. Bi taybetî cografyaya Kurdîstanî de serebûtê winayênî zêdîyayî ke no zî netîceya polîtîkayanê şerê taybetî ya. Ma sey cinîyan nêwazenê ney bêro sereyê ma.''

Fîlîzî îfade kerd ke têkoşîn, dezgeh, têgêrayîş û rêxistinê cinîyan bi destê dewlete yenê astengkerdene û vat: ''Dezgehê dewlete, şaredarîy, rêxistinê komelê sivîlî ganî seba cinîyan waran biafernê ke cinîyî xo bi asayî hîs bikerê.''