Mehlaya Dêrto ya Xelfetî de 51 kesî ameybî destbendkerdene, înan ra hewna 29 kesî nezaret de yê. Kesanê ke ameyê veradayene ra Rûken Denîze û  Rabîa Alakûşe çîyê ke qereqola cendirmeyan û Mudurîya Asayîşî de ameyê înan sere yew bi yew qal kerdî.

Îşkence, Zulm...

Denîze ard ziwan ke polîsan sere de a berda keyeyê dedê aye Saîdî û dima ra zî berdê bi qereqolî û vat: “Nêverdayî ke birayê mi paçê xo zî bido xora. Dayî ê ro, derb kerd. Înan ez, di birayê mi û maya mi veradayî. Îşkence û zulm ro ma kerd.   

Înan ez fek û rî ser erd ra kerda derg, bi payan şîyî serê mi. Dima ra înan ra yewî bi qayîşî da linganê mi ro. Destê mi zî pey ra girêdabî. Înan ra mi ra vat ‘şima terorîstî ardê keyeyê xo.’ Mi zî vat çîyêko winayên çino, çew nêameyo  keyeyê ma.”

Îşkenceyo bi Ceryanî

Denîze vat, “Destê mi girêdayî û tewrikêko sîya kerd sereyê mi. Çimê mi girêdabî. Înan ez tawanî ra daleqnaya. Dima ra ez berda cayêkê bînî. Ûca ceryan da mi. Seba mi vat ‘Ma ceryan danê la qe tesîr nêkeno, ma 200 voltî bidê.’ Înan nizdê saetêk ceryan da mi. Cinîyêka bîne zî ûca bîye. Yewna dewe ra amîbî destbendkerdene. Înan ceryan da her cayê a cinî.”

Rabîa Alakûşa ke dewa Dêrto de amî destbendkerdene, vat saete 02:30 de înan eşto keyeyê înan ser û vat: “Înan ma ra vat bêrê warî, eke şima nêrê ma do guleyan binê şima ra. Ma zî ameyî warî. Înan ma erd de kerdî derg. Hewş de înan zaf da pî û birayê mi ro. Îşkence şaxê TEM’î yê Riha de zî dewam kerd. Înan maya mi rê zî îşkence kerdibi. Ez ewnîyaya paştîya aye şopa qayîşan ra bîya sîya.”

Doktoran Qîrayîşê Ma Nêeşnawit

Alakûşe ard ziwan ke keyeyê aye ra Zekî Alakûş, maya aye Xezal Alakûşe, kekê aye Mehmet Alakûş û biracinîya aye Guley Alakûşe û meymanê înan Celal Ercan ameyê destbendkerdene û vat, “Înan keye ra tena ez veradaya, êyê bînî hewna binê çiman de yê. Înan ro birayê mi zaf îşkence kerd, qîrayîşê ci her ca ra şinawîyayêne. Doktoran cayê derbeyan dîyî, la çîyêk nêkerd. Nêweşxane de zî birayê mi qîrayêne la doktoran mudaxele nêkerd. Înan raporêk zî nêdda ma. Gama înan ma berdî verê doktoran destê ma pey de kelemçekerde bîyî.”