Şaristanê Lavrio yê Yunanîstanî de qatê corê nî yê bînaya qereqolê polîsan de ke sey kampa multecîyan yena xebitnayene cinîyêke ameye kiştene. Multecîya Rojawayê Kurdîstanije Evîne Ekrem Alî (35) hetê mêrdeyê xo Behzat Alîyî ra ameye kiştene.

Serebût vizêr şan saete 20:00 de qewimîya. Kiştox Ekrem Alî serebûtî ra dima rema. Dima ke domanê  Evîne şîyî kampe û zanayîş da selahîyetdaran serebût ame eşnawitene û selahîyetdaran zî xebere daye polîsan. Multecîyê kurdî zî seba tepiştişê kiştoxî  kuçeyanê şaristanî de gêrayî. Kiştox saete 3 de hetê multecîyanê kurdan û polîsan ra ame dîyene.Goreyê zanayîşan Evîn Ekrem Alîya Qamişloyîje 2 serrî verê cû keyeyê xo reyde ameye Yunanîstan û dadîya 4 domanan bîye. Cenazeya Evîne ameye berdene bi morgê Nêweşxaneyê Lavrio.

Dezgehanê Kurdan Nêrazîbîyayîş Mojna

Merkezê Kulturê Kurdîstanî yê Atina û Komîteya Kampa Lavrio serebût bi eşkerayîyêke şermezar kerd. Eşkerayîye de ame vîrvistene ke serebût qatê corî yê bînaya Qereqolê Polîsan ê Lavrio de bi  û ame vatene: Serebûtê kiştişî qatê corî yê polîsan de yeno kerdene û kiştox zî bi asanî eşkeno cayê serebûtî ra şoro. Serebûtî ra dima pêro multecîyê kurdî şaristan de tewrê polîsan benê cigêrayîşê kiştoxî kenê.''

Eşkerayîye de ame vîrvistene ke hema zî dezgehê çapemenîye yê Yunanîstanî bi zanayîşî xîret kenê ke bimojnê ke serebût kampe de bi. Multecîyan û dezgehê kurdan vera naye nêrazîbîyayîşê xo mojna û vat: "Kampa Lavrio bi cuya xo ya bi paradîgmaya demokratîke, ekolojîke û azadîperwerîye yena şinasnayene. Nêno qebulkerdene ke bêro mojnayene ke seke no serebût tîya de qewimîya. Binê nê xeberan de armancê sîyasîyî estê. Roniştoxê kampa Lavrio heta peynî nê serebût teqîb bikerê û heta ke şîdetê vera cinîyan Ewropa de bi temamî biqedîyo têkoşînê xo yê azadîya cinîyan dewam bikerê.''