Qeyûmê Şaredarîya Bismilî  dest na baxçeyo ke hetê cinîyan ra yeno ramitene ser û 50 cinîyî bêkar verdayî.

Wextê Partîya Haştîye û Demokrasîyî (BDP) de Şaredarîya Bismilî serra 2014 de seba cinîyan projeyêk vist dewre. Arazîya venge ya ke kişta Royê Dîcle de bî hetê cinîyan ra ameye ramitene.  Sibata 2017 de qeyûmo ke şaredarîye de ame cakerdene projeyê cinîyan da vindarnayene. Gama ke Partîya Demokratîke ya Şaran (HDP) 31ê adare de şaredarîye destê qeyûmî ra girewte proje reyna fîna dewre. Cinîyan bi keda pîle na arazîya venge kerd cayê berardişî. 50 cinîyê ke tîya de xebityayêne bi ramitişê zerzewat û meyweyî îdareyê xo kerdêne. Reyna engura ka tîya ramitêne naye ra agît zî viraştêne û rotêne. Hem cinîyan îdareyê xo kerdêne hem zî mesûlê nê baxçeyî hîna ercan ameyêne rotene û şarê Bismilî zî naye ra kêfweş bi. La reyna îradeyê şarî ame xespkerdene û şaredarîye de qeyûm ame cakerdene.  Qeyûm Kerem Suleyman Yukselî yo ke sîteyê şaredarîye de kurdkî wedart nika zî destûr nêdano cinîyî bikewê baxçeyê xo.

Qeyûm Nêeşkeno Cinîyan Cuya Xebate ra Raqilno

Vervatoxê projeyî Nesîbe Uygun vat hema ke ma nameyê projeyê xo nêno pa xebata ma ya komunale ameye vindarnayene û vera nê qerarî razînêbîyayîşê xo ramojna. Uygune vat: ‘‘Tîya ra têna 50 cinîyan ney keyeyanê înan zî îdareyê xo kerdêne, nika 50 keyeyî bîyî mexdûr. Xora no proje het hetê ekonomî ra hem zî  xeylêk hetanê bînan ra semedê cinîyan zaf muhîm bi. Cinîyan nê baxçeyî de nefes girewtêne. Xoser bî, azadîya ekonomîke fînayebî dest. La ê se kenê wa bikerê nêeşkenê vernîya projeyê ma bîgêrê. Wisar de ma do reyna projeyê xo bidomnê. Zîhnîyeto ke wazeno cinîyan cuya xebete ra raqilno rê cewabê ma do dewamkerdişê projeyê ma bo.‘‘