Merkezê Çapemeyîye yê QSDyî derheqê hêrişanê îşxalî û çalakîyanê hêzanê xo yê 24 saetanê peyênan de eşkerayîye daye û nê vatî:

''Şervanê ma vera dewleta tirke û çeteyanê ci xoverdayîşê xo yê meşrûyî domnenê. Vizêr (şeme) Yewîyanê Şehîd Harunî AwbendêTişrînî de 2 droneyê çekdarî yê kamikaze dayî war. Dewleta tirke ya îşxalkere şewa ke îne pabeste şemeyî heta serê sibayî dormeyê Awbendê Tişrinî pê obusan da bombayan ver. Teyarayanê şerî û droneyanê çekdaran dormeyê awbendî, banê xebatkaranê awbendî, qilê Syria Telî û dewa Xirbe Zemala dayî bombayan ver.

Vizêr saete 11.58 de dewleta tirke ya îşxalkere bi droneyê çekdarî dormeyê Awbendê Tişrînî de sîvîlî dayî bombayan ver. Netîceya hêrişî de rojnameger Egîd Roj şehîd bi, grûbêka sîvîlan birîndar bîye. Birîndarî nêweşxaneyan de yenê tedawîkerdene.

Teyarayanê şerî yê îşxalkeran dewê Tîna û Xeseq û qilê Sêvê dayî bombayan ver. Bi hewayêkê hemwextî dewê Tîna, Bîr Hiso, Xeseq, Dîkan, Melha û Sena pê obus, tanq, roket û havanan dîyayî bombayan ver.  Qilê Sêvê û Qereqozaxî de hewa û erdî ra ameyî hedefgirewtene. Hêrişan de milkê sîvîlan xesar dî.

Reyna dewleta tirke ya îşxalkere bajarekê Şiyûxa Jorîne  yê Kobanê da bombayan ver. Hêriş de milkê sîvîlan xesar dî. Herême de gêrayîşê droneyanê çekdaran dewam kerd.  Eyn Îsa de zî teyarayê şerî û droneyê çekdarî yê dewleta tirke gêrayî.''