Fermandarîya Pêroyî ya Yewinanê Pawitişê Cinîyan (YPJ) bi wesîleya 1ê Teşrîna Peyêne Roja Paştdayîşê Kobanê ya Dinya eşkerayîyêke weşanaye.

Mesaj de ame vîrvistene ke cerganê DAÎŞî 2014 de semedê çinkerdişê destkewteyanê kurdan hêrişê Kobanê kerd û dewleta tirke zî paştî daye ci. Dewamê eşkerayîye wina yo:

''Labelê înan xo vîr a kerd ke şarê Kobanê pê fikr û hîsê azadî xo perwerde kerdo. Cinî û lajê şaristanê Kobanê vera cerganê DAÎŞî bi îradeyêkê pîlî xo ver da û têkoşîn kerd. Kobanê de reyna yewbîyayîşê şarê kurdî qewimîya û hîsê merdimîye vera hêzanê serdestan û îşxalkeran bîyî yew.

Şarê kurdî çar parçeyanê Kurdîstanî ra semedê Kobanê ameyî û înan şerwnanaê YPG û YPJyî reyde mil bi mil şer kerd. Cerganê DAÎŞî bi barbarî û gêmarinî hêrişê Kobanê jerd û vat qey ê wextêkê kilmî de do biresê armancanê xo. Sercerg Erdoganî zî bi na hêvî vat 'Kobanê ha kewena.' La rayberîya şerwananê YPG û YPJyî û enternasyonalîstan de ame mojnayene ke ê do qetî meverdê ke Kobanê bêra îşxalkerdene.

Bi taybetî şerwananê YPG û YPJyî rayberîya fermandaran Rêvan, Ozgur, Gelhay, Herdem, Vîyane Peyman, Zehra Penaber, Sîbele Bulut de şerêko tarîxî kerd. Înan her hela şerî de vatêne 'Ma do ganê xo feda bikerê la ma do meverdê ke nê lingê gemarinî erdê ma yê fîrazî de gamêke bierzê.'

Kobanê nameyê têkoşînê şaranê azadîgîran o. Dewleta tirke ya îşxalkere heta ewroyî binkewtişê DAÎŞî hezm nêkerdo coka hêriş kena û la şerwanê YPJ û YPGyî do qetî rayîr nêdê îşxalî. Her kuçeyê Kobanê de gonîya cinîyanê Mezopotamya rijîyaye, ewro zî bi hezaran şerwannê YPJyî û YPGyî rêçê nê çêran de şinê. Coka qetî meverdê ke xeyalê îşxalkeran bibê raştikênî.

Ma reyna Roja Paştdayîşê Xoverdayîşê Kobanê pêro merdimîye rê fîraz kenê. Ma venga pêro şaranê azadîgeran danê ke wextê ci yo ke vera îşxalê Tirkîya pê ruhê Kobanê şer bikerê. Senî ke pêro hêzê dinya vera DAÎŞî bîyî yew û merdimîye xelisnaye ewro zî semedê rumetê merdimîya azade bi heman ruhî wayîrê Kobanê û Şorişê Rojawanî vejîyê. Ma vanê no ruhê xoverdayîşê Kobanê pêro şaranê bindestan rê do azadîyê bîyaro.''