Meclîsê Cinîyan ê DBPyî bi kombîyayîşê çapemenîye raporê kargehan ê  ''Vera şerê taybetî têhetameyîşê cinîyan'' eşkera kerd. 

Kombîyayîş bînaya DEM PArtî ya Çewlîgî de ame kerdene. Hemsereka DBPyî Çîgdeme Kiliçgun Uçar, Vervatoxa Meclîsê cinîyan ê DBPyî Bêrîvane Bahçecî, aktîvîstê TJA û Endamê MYKyî yê DBPyî zî tewrê kombîyayîşî bîyî.

Bêrîvane Bahçecî rapor wend.  Rapor de dîya zanayene ke kargehî 4ê temmuze de ameyî akerdene, bi temamî 73 kargehî ameyî serûberkerdene û qasê 3 hezar û 200 cinîyî tewrê nê kargehan bîyî. 

Rapor de ca dîya nînan: ''Cografyaya Kurdîstanî de heta 2015î planê leyminê ke ameyî hazirkerdene dima ra sey fuhuş, narkotîk, ajankerdiş û barkerdişê bizorî bi metodanê cîya cîyayan xo mojna ra. Merkezê polîtîkayanê şerê taybetî de feqîrîye est a. Rejîmo faşîst wazeno Kurdîstan de komelî erjanê ci ra raqilno. Nê prosesî de cinî û ciwanê ke bêhêvî ameyî verdayene hedefê polîtîkayanê şerê taybetî de yê. Waştişê înan o yo ke komelê bêtarîx, bênasname, bêvîr, bêtêkoşn û bêrêxistine biafirnê. Qirkerdişî, cînayetê ke kiştoxê ci nînê zanayene, înfazî, îdareyê pêtî, caardişê OHALî, destbendkerdiş, tepiştiş û îşkenceyî metodê aqlê dewleta-netewe yo ke Kurdîstan de xo mojneno ra. Dewleta ke wazena nê têkoşînî bişiknê bi îqtîdar û îtîfaqanê ci yê kontrayan kena ke metodanê neweyan ê şerî aver bêro.''

Rapor de nê tesbîtî ameyî rêzkerdene:

''Cinîyî yenê xizankerdene û bi nê hawayî muhtacê camêrd-dewlete yenê kerdene.

-Hêzê asayîşî seba ke cinîyan nasnameyanê înan ra dûrî bikerê têkilîye virazenê û dima cinîyan rê şantaj kenê.

-Wendekarê zanîngehî raştê ferzkerdişê ajanîye û têkilîyan yenê, eke qebul nêkerê yenê gefwerdene.

-Hêrişanê cinsîyan de faîlê sey qorcî û hêzanê asayîşî vera dîyenê.

-Kurdîstan de madeyê narkotîkî yenê vilakerdene, teşwîqkerdene.

-Kurdîstan de îmam û karmendê bînî karê asîmîkasyonî kenê.

-Fuhuş yeno vilakerdene û ferzkerdene.

-Cinîyî bi hîsê neçarîye verê xo danê xokiştişî.

-Cinîyî û ciwanan rê koçkerdiş yeno ferzkerdene.

-Têkoşînê cinîyan bi destê feodalan, tarîkatan û cematan yeno astengkerdene.

-Keyeyî yenê tehdîtkerdene ke wa domanê înan tewrê têkoşînê rêxistinkerdeyî nêbê.''

Rapor de dîya zanayene ke seba ke paştdayîşo komelkî bêro qelskerdnee, nasnameyê kurdan bêro qelskerdene, bi rayîrê operasyonan û propagandayan, bi ferzkerdişê koçkerdişî, bi şîdet û teşwîqê pêkewtişî polîtîkayê şerê taybetî yenê caardene.

Rapor de nê pêşnîyazî ameyî kerdene:

''-Wa paştdayîşo komelkî bêro hîrakerdene.

-Wa bi projeyan azadîya ekonomîke seba cinîyan bêra caardene.

-Wa seba cinîyan akademîyî û perwerdeyê alternatîfî 'bi ziwanê dayîke' bêrê akerdene.

-Seba rêxistinîyêka xurtî wa platformê medyaya dîjîtale bi aktîfî bişuxilîyê.

-Wa cinîyan rê destekê huqûqî bêrê dayene.

-Wa cinîyî tewrê sîyasetî bêrê kerdene.''

Peynîya raporî de bale ameye antene girîngîya têkoşînê rêxistinkerde û hêzê xopawitişî ser û ame vatene ke ganî cinîyî xo rêxistin bikerê.