Serekê Konseya Cinîyan a Rojawanî Cîhane Xidro bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan ANFyî rê qisey kerd.

Cîhane Xidro eşkera kerd ke şer, kaos û krîzan ra Rojhelatê Mîyanênî de şîdetê vera cinîyan zêdîya û no zî tewr zaf tesîrê Sûrîye û Rojawanî keno. 

Cîhane vat: ''Bi taybetî vîrusê Korona ra dima semedo ke cinîyî zereyê keyeyan de heps mendî şîdetê camêrdan zêdîya. Hetê bînî ra hêrişanê dewleta tirke de xeylêk cinîyî domananê xo reyde neçare mendî ke koç bikerê. Na rewşe zî meseleyanê cinîyan ê sey debare zêdînena. Herêmanê îşxalkerdeyan ê Rojawanî de cara cinîyî tim maruzê şîdet, tacîz, tecawuz, remnayîş û îşkenceyê hêzan û cerganê Tirkîya manenê.''

Cîhane Xidro bale ante ser ke herêmanê îşxalkerdeyan de se ra 30 cinîyî yenê remnayene û vat: ''Dewleta tirke cinîyan pê îşkence qetil kena û dima cenazayanê cinîyan rê zî îşkence kena. Sîyasetmedare Hevrîne Xelef têna yew mîsala nê kerdişî ya. Dewleta tirke armanc kena ke herême de demografî bivurna û şar bida koçkerdene. Dewleta tirke goreyê peymananê mîyanneteweyîyan tênêgêrena.

Cinîyî bi nê hawayî bêpawitişî manenê. Hetê bînî ra cinîyê Rojawanî seba azadîya xo û vera şîdetî têkoşînê xo rê dewam kenê. Dezgeh û rêxistinê mîyanneteweyî vera kerdişanê Tirkîya ganî hînî tewirê xo bimojnê.''