Kerkûk de 18ê çeleyî de netîceya suîkastê dewleta tirke de şorişgêre û serkêşanê têgêrayîşê cinîyan ê azadan ra Zelale Zagros şehîd bibi. Hemsereka TEV-DEMî Rûkene Ehmed ANFyî rê qisey kerd û suîkast ercna.

Rûkene Ehmed bale ante ser ke Şorişê Rojawanî serkêşîya cinîyan de ronîyayo û DAÎŞ serkêşîya cinîyan û şerwananê YPJyî de ameyo binvistene. Rûkene Ehmed vat: ''Seba ke nê xoverdayîşê cinîyan bêro şiknayene serkêşê cinîyan yenê hedefkerdene. Îqtîdar û dewletî nasnameyê cinîyan ê azadî ra tersenê.

Seke ewro ma şerê Îsraîl-HAMAS û Rûsya-Ukrayna de zî vînenê şeran de hêverî cinî û domanî benê mexdûr. Sîstem wazeno ke cinîyan bikero koleyan. Cinîyî bi rêxistinîya xo û têkoşînê xo anê ziwan ke nê sîstemî qebul nêkenê. Ewro dewleta tirke hêrişê binawanî, bînayanê xizmetî û dibistanan kena. Dewleta tirke seba ke sîstemê xo ferz bikera hende hêrişan kena. Cinî û komelê Rojawanî bi rêxistinî û serewedaritişê xo cewabê nê hêrişan danê. Şero ewroyîn mabênê îqtîdaran û azadîgîranê komelê azadî de yo. Êyê ke serkêşîya komelî kenê cinî yê.''

Rûkene Ehmed ard ziwan ke Zelale Zagros 31 serran têkoşînêko bêeman kerdo û vat: ''Ma Minbic de 2016 de pîya xebitîyayî. Aye vera DAÎŞî çar serran Minbic de bê mabên têkoşîn kerd. A sey nameyê xo Zelale bîye, kesêka fedakare û çêr bîye. Aye seba rêxistinîya embazanê ma yê cinîyan zî zaf xîret kerd. Embaze Zelale mîyanê Îdareyê Xoserî de zî seba temsîlîya cinîyan zaf xîret kerd.

Serkêşîya cinîyanê Rojawanî, cinîyanê Başûrî rê zî bîye nimûne. Şarê Kerkûkî sîstemê dewleta tirke û PDKyî rê mexdûr benê. Dewleta tirke Kerkûk de mabênê şaran de provakasyon û kaosan virazena. Embaze Zelale Kerkûk de rêxistinîya cinîyan xurt kerdêne, komelî de têkilîya viraştêne û şarî hayîdar kerdêne. Coka a ameye qetilkerdene. Ganî şexsê embaze Zelale de cinîyê Kerkûkî yew bibê, xo rêxistin bikerê û vera nê qetilkerdişan vejîyê.

Rojhelatê Kurdîstanî û Vakurê Kurdîstanî de cinîyî erzîyenê zîndanan. Cinîyê kurdî her ca de xoverdayîş de yê. Xoverdayîşê embaze Sara bi pîlêr û resa her cayî. Ganî vera nê qirkerdişan û hêrişan cinîyî wayîrê xoverdayîşê Sara, Hevrîne Xelef, Jîyane Tolhildan û Zelale Zagros vejîyê. Dewleta tirke bii nê hêrişan kena ke hêvîya azadîya cinîyan pûç bikera. Vera ney cinîyî ganî yewîya xo awan bikerê. Yewîya cinîyan eşkena peynîya îqtîdar û qirkerdişan bîyara.''