Ronayoxanê PKKyî ra Sakînê Cansiz (Sara), Temsîlkara KNKyî ya Parisî Fîdane Dogan (Rojbîne)  û Endamê Têgêrayîşê Ciwanan Leyla Şaylemez (Ronahî) yê ke Qirkerdişê Parisî yê 9ê Çeleyî de ameyî qetilkerdene, serrgêra şehadetê xo de serê mezelanê xo de ameyî vîrardene.

Sakîne Cansiz Dêrsim de serê mezelê ci û banê HDPyî de ameye vîrardene. Rêxistina HDPyî de semedê hîrê şehîdan mûmî ameyî tafînayene. Serekwekîla Koma HDPyî Merale Daniş Beştaşû endamê TJA  û xeylêk kesî tewrê vîrardişî bîyî. Vîrardiş de derheqê Cansize de sînevîzyon ame seyrkerdene. Beştaşa ke tîya qisey kerd vat: ''Ma yew hîkayeya pêrodayîşî goşdarî kerd ke no pêrodayîş do çirey meqedîyo.'' Dima şarî verê xo da mezelan. Polîs û leşkeranê ke dekewtiş û vejîyayîşî girewtî, destûr nêda  û hêrişê şarî kerd. Merale Daniş Beştaş pîya bi wekîlanê bînan şîyî vilîkî serê mezelê Sakîne Cansiz de vilîkî nayî ro.

Fîdane Dogan zî memleketê ci qezaya Erbîstanî ya Mereşî de serê mezelê ci ameyî vîrardene. Vervatoxa HDPyî Ebru Gunaye, Meclîsê Cinîyan ê HDP, Wekîle Ayşe Surucu, Meclîsê Dayîkanê Haştîye , aktîvîstê TJA, merdimê Dogane û xeylêk kesî tewrê vîrardişî bîyî. Ebru Gunaye vat: ''Eke no qirkerdiş des serrî biameyêne zelalkedene qirkerdişê diyînî nêameyênekerdene û Evîne Goyî, Mîr Perwer û Abdurrahman Kizil nêameyêne qetilkerdene. Ewro heme dinya bi felsefeya sembolê xoverdayîşî yê 'Jin jiyan azadi' yê cinîyan ê kuran têkoşîn kena. Wa çimê şima peyê de memano, mîrasê şima yê  'Jin jiyan azadî' o biciwîyo.''

Leyla Şaylemez zî Mersin de serê mezelê xo de ameye vîrardene. Vervatoxa Meclîsê Cinîyan ê HDPyî Ayşe Acar Başaran û wekîlê HDPyî, babîyê Şaylemeze Cumalî Şaylemez û xeylêk kesî tewrê ci bîyî. Cinîyan sloganê "jin, jiyan, azadî" û  "Şehîd namirin" eştî û serê mezelî de vilikî nayî ro. Başarana ke tîya qisey kerd, ard ziwan ke ê zaf hole zanê ke peyê nînan de îqtîdarê AKPyî est o û  vat la ê sekenê wa bikerî cinîyî rixmê heme hêrişan do têkoşînê xo ra peyser game meerzê.''