Şehîdanê Qirkerdişê Parisî yê 913e Çeleyê 2013î Sakîne Cansiz, Fîdane Dogan û Leyla Şaylemez serê goranê xo de û xeylêk şaristanan de ameyî yadkerdene. Yadkerdişan de mesajê ''Sakîne tarîxê ma ya. Ma do qetî têkoşînê aye ra fek vera nêdê'' dîya.

Dêrsim

Rêxistina Dem Partî seba şehîdanê Parisî û Sêvê Demîr, Fatma Ûyar û Pakîze Nayir ê ke wextê qedexeyê tebervejîyayîşî de Silopîya de ameybî qetilkerdene bînaya DADî de bernameyêk serûber kerd. Vervatoxa Meclîsê Cinîyan ê DEM Partî Halîde Tukroglu, Wekîla Dêrsimî Aytene Kordu, Hemvervatoxa HDKyî Esengule Demîr, Hemserekê DADî Kadrîye Dogan û Zeynel Kete tewrê bernameyî bîyî.

Merasîm de seba 6 cinîyan findî ameyî tavistene û sînevîzyonêk ame mojnayene.

Wekîla DEM Partî Aytene Kordu tîya de qisey kerd û vat: ''Embaze Sakîne tarîxê ma ya. A sey domanêka Dêrsimî tim têkoşîn kerd.'' Îdarekara MEBYA-DERî Meryeme Soylu vat: ''Embaze Sakîne yim waşt ke xeyalê ci yê nêmcetî temam bibê. Ganî ma xeyalanê aye temam bikerê.''

Dima loqmayî ameyî vilakerdene.

Girseyî waşt gorê Sakîne Cansiz (Sara) zîyaret bikero la polîsan teyna destûrê 10 kesan da. Halîde Turkoglu vera na kerde nêrazîbîyayîşê xoo mojna û vat ke ê do qetî kiştoxan ra hesab bipersê.

Mereş

Fîdane Dogan (Rojbîne) taxa Xoponî ya qezaya Elbîstanî ya Mereşî de serê gorê xo de ameye yadkerdene. Wekîlê DEM Partî Ceylane akça û Dîlane Kunt, Mayê Haştîye, aktîvîstê TJA, Komeleya Elewîyanê Demokratîkan (DAD) û xeylêk kesî tewrê yadkerdişî bîyî. Polîsan dormeyê taxe û goristan girewt.

Wekîle Ceylane Akça yadkerdiş de qisey kerd û ard ziwan ke bi nê qirkerdişan yeno waştene ke cinîyî wa îteat bikerê la ê do qetî îteaet nêkerê û tim têkoşîn bikerê.  Wekîle Dîlane Kunt Ayan îfade kerd ke têkoşînê cinîyan ê kurdan bi şîarê 'Jin, Jiyan, Azadî' pêro dinya rê vila beno. Vervatoxa DBPyî Bêrîvane Bahçeci serê gorî de vat ke ê do têkoşînê şehîdan hîna berz bikerê. 

Qiseykerdişan ra dima bi sloganan girseyî qerenfîlî nayî gorê Fîdane Dogan ser.

Mersîn

Wekîlê Dem Partî Salîha Aydenîz, Perîhane Koca û Alî Bozan, Hemsereka SYKPyî Canane Yuce, Mayê Haştîye û xeylêk kesî tewrê yadkerdişê Leyla Şaylemez (Ronahîye) bîyî. Canane Yuce merasîm de dîyar kerd ke cinîyî do tim wayîrê mîrasê şehîdanê Parisî vejîyê. Salîha Aydenîz zî vist vîrî ke rixmê hende serran hema zî faîlê raştikênî nêameyê cezakerdene.

Qiseykerdişan ra dima qeranfîlî ronîyayî gorê Şaylemeze ser.

Îzmîr

Serkêşîya TJA de bînaya DEM Partî de 3 cinîyê şorişgêrî ameyî yadkerdene. Yadkerdiş de sloganê sey “Jin jiyan azadî” û “Şehîd namirin” ameyî vatene û sînevîzyonêk ame mojnayene. Hemsereka DEM Partî ya Îzmîrî Zehra Vezan Karabulut merasîm de vat: ''Adirê cinîyanê ke ameyê qetilkerdene zerrîya ma de qetî hewna nêşoro.''

Wan

ŞanoWan de serba hîrê cinîyan qeranfîl û findî ronîyayî. Hemsereka DEM Partî ya Wanî Gulderene Varli merasîmê yadkerdişî de da zanayene ke Sakîne Cansiz û di embazê ci hetê dewleta tirke ya faşîste ra ameyê qirkerdene. Merasîm bi sloganan qedîya.

Colemêrg

Rêxistina DEM Partî de bernameyêkê yadkerdiişî ame kerdene. Hemsereka DEM Partî ya şaristanî Humeyra Akrmut yadkerdiş de ard ziwan ke cinîyê serkêşî tim yenê hedefkerdene. Hemsereka DEM Partî ya Geverî Fîlîze Saygi zî qirkerdiş şermezar kerd.