19 serranê îqtîdarê AKPyî de 7 hezar û 455 cinîyî kişîyayî. Aktîvîsta Têgêrayîşê Cinîyan ê Azadan (TJA) Nevrîye Çur  polîtîkayê AKPyî yê vera cinîyan û xopawitişê cinîyan ê vera şîdetî ANFyî rê ercnayî.

Nevrîye Çur ard ziwan ke sebebê qirkerdişê cinîyan polîtîkayê AKPyî yê û vat: ''Pê qanûnan kiştoxê cinîyan vera dîyenê. Nê wextanê peyênan  de cinîyî hînî vera şîdetê camêrdî xo pawenê. Prosesê janî de zî şîdet û qirkerdişê vera cinîyan zêdîyayî û bi seyan cinîyî zereyê keyeyî de kişîyayî.''

Nevrîye pare kerd ke cinîyê têkoşerî hedefê îqtîdarî de yê û vat: ''Bedenê gerîla Ekîne Wan ame teşhîrkerdene, aktîvîsta TJA Rojbîne Çetin rê îşkence ame kerdene. Nê polîsê îşkencekerî nêameyî hukmkerdene la avûkata ke îşkence eşkera kerd yena hukmkerdene. Reyna pê tepişîyayîşê Vervatoxa TJA Ayşe Gokka û Leyla Guven îqtîdar wazeno têkoşînê cinîyan qels bikero. La key ma ra yew tepişîyena ma benê hezar. Coka ma nêmeyê komelî yê.''

Nevrîye eşkera kerd ke dewlete Kurdîstan de vera cinîyan polîtîkayanê taybetan kena û vat: ''Îpeke Er bi rojan maruzê tecawuzê çawiş Musa Orhanî bîye. Musa Orhan dima ke tepişîya cade vera dîya. Çunke Îpeke cinîyêka kurde bîye. Reyna Gulîstane Doku serrêk a vînbîyaye ya. Nê serebûtî de zî kesêk nêame hukmkerdene. Dewlete bi polîtîkayanê xo cinîyan rê vana 'Ya ti bimira yan zî bikişîya.' Ganî vera polîtîkayanê dewlete û hîşmendîya nêrî cinîyî her ca de xo birêxistin bikerê û bipawê.''