25ê hezîrana 2015î de hêrişê DAÎŞî û dewleta tirke yê vera dewa Berxbotanî ya Kobanê de zafê ci doman û cinîyî 28 sivîlî ameyî qetilkerdene. Tîya de domanê Dayîke Zerge Mustafa, Helîme û Kîfah Bahadîn û tornê ci Jîyan û Aras Cinêd şehîd bîyî. La aye no dej vurna xoverdayîşî.

Dayîke Zerge dewa Berxbotanî de dadîya xo ra bîya û tîya de bena pîle. Mêrdeyê ci Elî Bahadîn 1986 de têgêrayîşê azadîye şinasneno. Keyeyê Zerge tim meymandarîya gerîlayan keno. Dewe de reya verêne lajê dayîke Zerge Osman Bahadîn (Ferhat) tewrê gerîlayan beno û 1992 de zî şehîd beno. Osman dewe û dadîya xo rê beno hêvî û serkêşê xoverdayîşî. 

Dayîke Zerge vera tedayanê rejîmê Baasî zî apey game nêerzena û sey çemêkî bi coşî mîyanê xoverdayîşî de herikîyena. Zerrîya ci seba ke erd, kultur, nasname û estbîyayîşê şarê xo bipawa gulp dana.

Aye tim vatêne 'Ez tîya de ya!' û bîye sembola xoverdayîşî ya mende.

Dayîke Zerge sey sembolêka Şorişê Rojawanî 2012 de Kobanê de, vernî de serkêşîya girseyan kena. Tewirê ci di çîyî temsîl  kerdêne; xopawitiş û têkoşînê azadîye. Keleşê destê ci çekêke ney la  vengê hêvî û dejan bi. 

Xoverdayîşê Kobanê ameyêne manaya pawitişê hêvî, kultur û nasnameyêkî. Coka Dayîke Zerge cewherê yew serewedaritişî ya. A seba ciwanan çimeyê îradeyî û têkoşînî bîye. 

Dayîje Zerge musaye ke bi çimanê xo bewna rîyê bêrehmî yê şerî ra. A tim serê rêçê şehîdan de şîye. Seba ke dayîke Zerge perwera erdê xo û têkoşînê azadîye bîya torn û domanê aye zî tewrê YPJ û QSDyî bîyî. 

Dayîke Zergeya ke dadîya çar şehîdan a, lajê ci yê bînî 19ê tebaxe de wefat kerd. Dayîke Zerge zî 21ê tebaxe de krîzê qelbî ra dinyaya xo bedilnaye. Dayîke Zerge dejê ewladanê xo yê şehîdan vurna xoverdayîşî. A sey sembola xoverdayîşî û vîrê komelî ya mende do vîran de bimana.