Berîtan Serhete ke cuya xo ya gerîlatîye de mîyanê xeylî şeran de mende, Kerkûk de pîya bi embazanê xo dimayo ke şerêko bêhempa 2016 de hemverê DAÎŞ’î de dana şina wareyê Zapî. Berîtana ke mucadele û qerardarîya Şehîd Berîtane dana xo ver Gulane de çalakîya ke layîqê ci bîye kerde, bîye Berîtane û tewrê govenda azadîye bîye.

Berîtan Serhete 1992 de Qers de amî dinya. Keyeyê ci welatperwer o. Rîyê zextanê dewleta Tirkî ra koçê Almanya kenê. Her dem bi hesreta welatî ya. Rixmo ke serrî ser ra ravêrenê zî a Almanya rê xerîb manena. Têkilîya aye ya embazan dir her roje hîna bîyêne zêde û nizdê mucadeleyî bîyêne. Wazena tewrê refan bibo, la a game emrê aye qij o, embazî qebûl nêkenê. Gama ke resena 18 serrîya xo vana tu astengî verê mi de nêmenda û 2010 de verê xo dana koyanê ke bêrîya înan kerdebî.

Çende Ciwîyayêne û Fam Kerdêne Meylê Aye Hîna Bîyêne Zêde

Qe xo xerîb nêdîyêne. Hendî ê cayan de bîye ke eşkayêne helm bigêro. Cuya yewrenge ya Ewropa ra xelesîyabî, resabî zafrengîya koyan. Pratîkê xo yê ewilênî Heftenîn de dana. Seba ke ûca Vîyan Sorane mendêne manewîyatêko cîya aye dir virazîyabi. Aye gerîlayanê verê xo fikirîyayêne û şopa înan ser o şîyêne. Aye çende fam kerdêne û ciwîyayêne meylê aye seba koyan hîna bîyêne xurt.

Doçka Asê Mende, Berîtane Nê

Rojê peyênî yê Êlule bî. Dişmen heman roje de dimayo ke çend sekmanê înan ameybî kiştene pêser o obusî eştêne. Hedefê înan Merganiş bi. Doçkaya Berîtane û Nalîne nêşuxulîyayêne. Dima gama ke tede vet ke pense aye dest de ya doçka amî aye vîrî û bi heman hawayî ame aye vîrî ke hemrayî cêr de yê. Cade agêraye doçka ser. Çira asê mendebî? Kerdêne ke fam bikero. Yew bi yew gama ke perçeyî akerdî û problem dî, ancî perçeyî dayî pêwa û serê dişmenî de şuxulna. Qilo ke dişmen ûca bi çend deqeyan ker bi. Embazê ke cêr de mendîbî rixmê her çîyî de resaybî cayê xo. Ver bi şanî vengê leşkeranê dişmenî hîna bi zêde. Ma zî rehet bîyî ke ma pîya mendîbî û ma ser o fikirîyayêne ke ma do na game ra tepîya se bikerê.

A Roje Çewî Xo Tê Nêda

Ver bi serê sibayî gama ke tîrêjê rojî sere wedartêne, serd bi, xoza zî qeresyayêne. Verê eştişê rojî ganî keşf biameyêne kerdene. Berîtane çek wedart û dûrbîna xo girewte ewnîyaye erazîye ra. Bêvengîya dormeyî çikînî vistebî zerrîya aye. Heta ver bi nîmrojî veng dişmenî ra nêame. Asmên tayê saya bi. Gama ke mewzî de bîye reyêk de vernîya xo de sîyayîyêk dîye. Rew tede vete ke a sîyayî sîyayîyêka sekmanêk bîye û bi îşaret hetê qilê hemverî ramot embazanê xo yê ke kemerê nizdî de bî. A roje çewî xo tê nêda.

Deyîra Vayî Goşdarî Kerdêne

Rixmo ke Berîtane Ewropa de bîbî pîle zî tu xusûsîyetê Kurdistanî xovîr ra nêkerdîbî. Zerrîya aye bi heskerdiş pir bi û kedkare bîye. Her kesî deyîranê aye ra hes kerdêne. Zerrînimz bîye, hes kerdêne ke merdiman goşdarî bikero. Ge-ge şîyêne serê kemerêka berze. Gama ke mi vatêne ‘ti se kena,’ aye vatêne “Ez deyîra vayî goşdarî kena, pelê daran zî ê dir vanê.”