Merkezê Jineolojî yê Silêmanî  vizêr panelê bi nameyê 'Vînayîşê Jineolojî û îmtîhanê cinîyan ê hunermendan' kerd. 4 hunermendê cinîyê Xende Hemîd, Zehra Dogan, Rojgare Mehmûd û Nîgha Aksel sey qiseykerdox beşdarê panelî bîyî.

Destpêk de derheqê kar û xebatanê cinîyan de fîlmo dokument ame mojnayene. Dima Rojgare Mehmûd qisey kerd.

Rojgare Mehmûd ard ziwan ke nawnayîşanê parî yê Silêmanî de cinî û camêrdî yewbînan ra dûrî vindere a zî seba ke na rewşe rexne bikera veyvekê plastîkî viraştî û kerdî mîyanê camêrdan

Zehra Dogan zî vist vîrî ke dewleta tirke seba ke aye zulmê dewleta tirke resimêkê xo demojna cezaya zîndanî ya 3 serran daye ci. Zehra Dogan eşkera kerd ke dima ke a zîndanî ra vejîyaye musaye ke resimê ci zaf eleqe dîyo. Zehra vat: ''Zîndan de viraştişê resimî qedexe bi la ma pê fistananê xo û perranê milçîkan xo rê tabloyî viraştî û qedexeyê dewleta tirke protesto kerd. Dima ke ez zîndanî ra vejîyay ez şîya Ewropa. Labelê Ewropa xîret kerd ke kesayetê mi populer bikera la seba xebata şarê mi xîret nêkena. Ez nê tewirê Ewropa şermezar kena. No kesayet netîceya xoverdayîşê cinîyan ê kurdan de mi de virazîya. No şexsê mi nîyo. Ez hêzê xo cinîyan ra gêna.''

Dogane ra dima Nîgha Aksel qisey kerd û da zanayene ke Zanistê Jineolojî musneno ke ê bi hawayêkê estetîk û etîkî biciwîyê. Aksele vat: ''Zanistê îqtîdar û sîstemê serdestîya camêrdan huner parçe parçe kenê. La Jineolojî kena ke cuye weşêr biba. Sîstemo  nikayên hetê camêrdan ra virazîyayo. Ma wazenê pê Jineolojî seba cinîyan cuyêka weşêre awan bikerê.''

Panel beşê pers û cewaban ra dima qedîya.