Yewîya Cinîyan ê Sosyalîstan (SKB) eşkerayîyêka nuştekîye weşanaye.

Eşkerayîya wina ya:

"9ê çeleyê 2013î de netîceyê bazarî û hemkarîya gemarine ya dîkattorîya AKP-Erdoganî ya bi Fransa şorişgêrê cinîyê Sakîne Cansiz, Fîdane Dogan û Leyla Şaylemez Merkezê Parisî de mîyanê roje de bi sûîqastêkê xayînî ameyî qetilkerdene. Nê qirkerdişî ra 7 serrî vîyartî, têkoşînê seba caardişê edaletê ratikênî dewam keno. Îdaîanameyê dewa de têkilîya dewleta tirke û MÎTî bi nê qirkerdişî eşkera yena vatene. La sucdar Omer Guney çend rojî destpêkerdişê roniştişê mehkeme ra verî bi mergêkê şikdarî û nişka meydan ra ame wedaritene.

Her hîrê cinîyê kurdî zî bi tewrbîyayîşê xo yê mîyanê têkoşînê azadîye yê Kurdîstanî bîyî cuyêka canbexşane. Sakîne Cansiz xoverdayîşê xo yê zîndanî de zî, cuya xo ya gerîlatîye de zî û her ca de rayberîya cinîyan kerde.Fîdane Dogan şorişgêrêka cinî ya ke Ewropa de bîye pîl, têkoşînê dîplomasîyê Têgêrayîşê Azadîye yê Kurdîstanî ard ca. Leyla Şaylemez xo bi xoverdayîşê xo bîye endamê têkoşînê azadîye.

Nê qirkerdişî vera têkoşînê azadîye ameyî kerdene. Cinîyê kurdî resayî asta azadbîyayîşî ke sînoran nas nêkenê. Hêriş vera xîret û îradeyê cinîyan ame kerdene. Qirkerdişê 9ê çeleyî bale anceno torra têkilîyanê gemarinan ê mîyanneteweyîyan ser.Dewleta tirke ya kiştoxe wazena Ewropa de komloyanê neweyan, cînayetanê sîyasîyan bika. Şebekeyê sucî yê ke vizêr Sakîne Cansiz, Fîdane Dogan û Leyla Şaylemez qetil kerdî nika zî xîret kenê ke qurbananê xo yê neweyan bitersnê bitepişê. La xîretê înan bîlasebeb o. Sey vizêr ewro zî ma do bi têkoşînê hemparê şarê ma vera cergan û Qesre wurzê payan ser.

Serrgêra 7. ya Qirkerdişê Parisî de ma çend vengê xo berz kerd zî ma nêeşkayî verê ci bigêrê. Nika ma do verê qirkerdişanê neweyan bigêrê.Seba ke serra ci ya 7. de kerdişê rastikênî yê Parisî bêrê eşkerakerdene, verê qirkerdişê sîyasî yê neweyî yê Ewropa bêro girewtene ma venga cinîyanê koçberan ê kurdîstanijan û tirkîyayîjan ê Ewropa danê ke 11ê çeleyî de ma Paris de kom bibê."