Fermandaranê YPJyî ra Sozda Efrîn têgêrayîşê DAÎŞî yê Kampa Holî, xîretê gandarbîyayîşê DAÎŞî û têkoşînê şerwananê YPJyî ANFyî rê ercnayî.

Fermandare Sozda Efrîn vist vîrî ke xelisnayîşê Dêra Zorê ra dima cergê DAÎŞî bi taybetî ê cinîyî Kampa Holî de ameyî cakerdene û vat: ''Cinîyê DAÎŞî wazenê DAÎŞ newe ra gandar bikerê. Her çiqas nînan şarê ma rê zulm kerd zî ma goreyê krîteranê merdimîye verê înan de têgêrenê. Kampa Holî de bi desan serebûtê kişîyayîşî qewimîyayî. Cinîyê DAÎŞî mîyankî ra ê bînan kişenê û cenazayanê înan zî binê xeyman de wedarenê. DAÎŞ hema nêqedîyayo.''

Sozda Efrîn derheqê hukmkerdişê cergan de wina vat: ''Ma wazenê înan bi hawayêkê edîlî hukmn bikerê û înan teslîmê welatanê ci bikerê. La nê welatî cergan nêwezanê. Nika domanê Kampa Holî benê pîlêr û nê domanî pê hîşmendîya DAÎŞî weye benê. Eke nê cergî nêrê hukmkerdene do bibê tehluke. Dewleta tirke seba ke cergî reyna aktîf bibê hetkarîya înan kena. ''

Fermandara YPJyî Sozda Efrîn da zanayene ke ê her tim hetê şarê xo de yê û vat: ''Seba asayîşê şarê xo çi destê ma ra bêro ma do bikerê. Ma venga pêro ciwananê ma zî danê ke wa goreyê wezîfeyê xo yê welatperwerîye têbigêrê. Ma do pê bawerîya şarî herêmanê îşxalkerdeyan bixelisnê. Ma sey şerwananê YPJyî amade yê ke seba şarê xo canê xo feda bikerê. Serkewtiş do bibo ê ma.''