9ê çeleyê 2013î de ronayoxa PKKyî Sakîne Cansiz (Sara), Temsîlkara KNKyî ya Parisî Fîdane Dogan (Rojbîne) û Endama Têgêrayîşê Ciwanan Leyla Şaylemez (Ronahî) Paris de ameybî qetilkerdene.

Paytextê Swêdî Stockholm de 3 cinîyê kurdê ke 9ê çeleyê 2013î de ameybî qetilkerdene bi merasîmêk ameyî yadkerdene.

Merasîm rayberîya Meclîsê Cinîyan ê Amara û Merkezê Kulturê Kurdan de lokalê komele de ame kerdene. Merasîm de Sêvê Demîr, Fatma Uyar û Pakîze Nayir zî ameyî yadkerdene ke 4ê çeleyê 2016î de Silopî de ameybî qetilkerdene.

Nameyê Meclîsê Cinîyan ê Amara ser o Ayşe Goktepe qisey kerd û îfade kerd ke Qirkerdişê Parisî hetê dewleta tirke ra ame kerdene. Goktepe vat: ''Xoverdayîşê zîndanî yê Sara seba kurdan bibi hêvî. A sembola efsanewîye bîye. Dewleta tirke qirkerdişê cinîyan dewam keno. Ganî Erdogan sûcanê xo ra bêro hukmkerdene.''

Hemsereka Merkezê Kulturî Mîrheme Yîgît zî bale ante grevê vêşanîye yê tepişteyan ê vera tecrîdê Îmraliyî ser û vat ke ganî vera tecrîdkerdişê Rayberê Şarê Kurdî Abdullah Ocalanî û hukmkerdişê Erdoganî her kes têbigêro.

Latîf Ceboyo ke birayê ci Mehmet Şîrîn Cebe 13ê çeleyê 2013î de Nisêbînî de hetê dewleta tirke ra amebi qetilkerdene ard ziwan ke seba ke kurdî wayîrê mîrasê şehîdan vejîyê ganî têkoşîn bikerz bikerê.