Mabênê 5-6ê teşrîna peyêne de hetê Torra Cinîyî Ameyoxî Vurnenî ra Zanîngehê Teknîkî yê Berlinî de Konferansê Cinîyan o Mîyanneteweyî yo 2. bi şîarê 'Şorişê Ma: Azadkerdişê Cuye' bêro kerdene. Endama Komîteya Amadekarîye ya Konferansî Sultane Oger derheqê konferansî de cewab da persanê ANFyî.

Sultane Oger îfade kerd ke muracatê seba beşdarîye qedîyayê û vat: ''Seba konferansî eleqeyêko pîl est o. 41 welatan ra 800 cinîyî do beşdarê konferansî bibê ke nê cinîyî aktîvîst, xoverdayox û têkoşer ê. Konferansê ma netîceya têkoşînêkê rêxistinkerdeyî de yeno kerdene. Cinîyê kurdî nê têkoşînî de wayîrê rolê serkêşîye yê. Dinya seba ke serdestîya camêrdan û netewe-dewlete ser o sîstemêk awan kerdo nika mîyanê krîzan de ya. Ma konferansê xo ke modelê rêxistinîye yê ameyoxî ser o qisey bikerê. Vera paradîgmaya îqtîdarî cinîyî wayîrê paradîgmaya xo yê. Konferansê ma de na babete hetê teorîkî ra bêra nîqaşkerdene. Netîceyanê nê nîqaşan de zî seba awankerdişê mekanîzmayêka xebate ya hempare bingeyêk do bêro awankerdene.''

Sultane Oger bale ante serewedaritişê cinîyanê Îran û Rojhelatê Kurdîstanî û pare kerd ke konferans tam wextê xo de yeno kerdene. Ogere vat: ''Verî herêmêka sînorkerde de têkoşînêk est bi. No têkoşîn vera bi pîl, Rojhelatê Mîyanênî de vila bi û ewro bi global. Her çiqas ma ziwananê yewbînan nêzanenê zî armancê ma yew ê. Hewceyê pêro cinîyan bi nê konferansî est bi. Ma pê bawer ê ke nê konferansî de coş do bizêdîyo û konferansî ra pey zî cinîyî hîna bi xurtî gaman bierzê.''