Tirkîya û Vakurê Kurdîstanî de kişîyayîşê cinîyan her ke şino zêdîyeno. Sereka Komeleya Cinîyan a Rosa Suzane Îşbîlen derheqê babete de ANFyî rê qisey kerd.

Suzane da zanayene ke meseleya kişîyayîşê cinîyan meseleyêka global a û vat: ''Rojhelatê Mîyanênî de zî meseleya cinîyan ra têmîyankewtişêko pîl est o. Cinîyî hinî serdestîya camêrdan qebul nêkenê coka têkoşîn kenê. Ewro Afganîstan de prosesê Talîbanî est o. Îran de zî meseleya cinîyan rojdem de ya. 

Cinîyî seba ke bieşkê xo şîdetê camêrdan ra bipawê hinî pawitişê xo kenê. Ewro Tirkîya û Rojhelato Mîyanên seba cinîyan asayî nîyê. Xopawitişê cinîyan rêxistinbîyayîş o. Ganî cinîyî verê şîdetê camêrdan de sereyê xo nêarê war, pawitişê xo bikerê.''

Suzane bale ante ser ke polîtîkaya bêcezaverdayîşê kiştoxan bîya sebeb ke hûmara kişîyayîşê cinîyan bizêdîya. Suzane vat: ''Hewteyêk de 4 cinîyî ameyî kiştene. Goreyê doneyanê Platformê 'Ma Do Verê Kişîyayîşê Cinîyan Bigêrê' mîyanê rojêke de tewr tay di cinîyî kişîyenê. Seba ke no biqedo ganî qanûnê raştî bêrê viraştene. Ganî verê rayîr û metodanê şîdetî bêro girewtene.''