Vervatoxa Meclîsê Cinîyan a HDPyî Dîlane Dîrayet Taşdemîr netîceyê Konferansê Cinîyan û sîyasetê dewirê neweyî ercna. Taşdemîre pare kerd ke seba çinkerdişê tecrîdê Ocalanî ganî têkoşînêko hîna xurtêr û dergêr bêro kerdene.
Konferansê Cinîyan ê HDPyî 18-19ê çeleyî de ame kerdene.Vervatoxa Meclîsê Cinîyan a HDPyî Dîlane Dîrayet Taşdemîr ANF reyde qisey kerd. Taşdemîre da zanayene ke Konferansê Cinîyan de proses ame ercnayene. 300 cinîyî tewrê konferans bîyî.
Taşdemîre vat: ''Cinîyanê ma derheqê şerê dinya yê hîrêyînî de ke nika Rojhelatê Mîyanênî de esto muneqeşeyê pîlî kerdî. Cinîyanê ma vera hêzanê kapîtalîstan, emperyalîstan tewirê xo mojna û weriştî payan ser.No Şorişê Rojawanî de pratîze bî. Seserra 21. de hînî şorişî rayberîya cinîyan de yenê kerdene. Sîstemê Rojawanî seba pêro dinya çimeyêkê bifayde yo. Ma sey Meclîsê Cinîyan ê HDPyî hewce dî ke paştî bidê xoverdayîşan û têkoşînan ê hemparan ê dinya."
Taşdemîre bale ante tecrîd ser û vat: "Vera sîyasetê şerî, asîmîlasyonî, qeyûm û polîtîkata çinkerdişî niha zîhnîyetêk, modelêko xurt ê têkoşînê polîtîk-îdeolojîk esto. Bêguman oyo ke felsefe, metod û bernameyê nê têkoşînî viraştî Abdullah Ocalan o. Vera birêz Abdullah Ocalanî tecrîdêko giran esto. Xîret kenê ke nê tecrîd giranêr bikerê. Tecrîd konferansê ma de rojdemanê ma yê bingeyînan ra yew bi û vera tecrîdî ganî têkoşînêko biisrar, xurt û derg do bêro kerdene."
Taşdemîre bale ante kongreya ke 23ê sibate de do bêra kerdene û vat: "Hêvîdar a ke kongreya ma de cinîyî do hîna zêdêr bieşkê tewrê sîyasetê demokratîkî bibê û ma do HDPyo ke ver bi îqtîdar şino awan bikerê."
