Parlementera HDPyî Dîlane Dîrayet Taşdemîr 25ê Teşrîna Peyêne Roja Têkoşînê Vera Şîdetê Serê Cinîyan a Mîyanneteweyîye ANFyî rê erjna.

Taşdemîre bale ante ser ke 25ê Teşrîne Peyêne Tirkîya û Kurdîstan de reyna bi hêrişê vera têkoşîn û destkewteyanê cinîyan yeno vervazîkerdene û vat: ''Îqtîdarî prosesê pandemî zî sey firsedêk şuxulna û heme çalakî û aktîvîteyê muxalîfan vindarnayî. La karê xo yê sîyasîyî û kongreyê xo kerdî. Wazenê ke nê prosesî goreyê xo bişuxulnê û komelî bikerê bêveng ke wa çew vera înan mevejîyo. La rixmê heme hêrişê înan Kurdîstan û Tirkîya de cinîyî têkoşînê xo rê dewam kenê.''

Taşdemîre vist vîrî ke nê panc serranê peyênan de şîdetê vera cinîyan dilab-hîrlab zêdîya û vat: ''Ma ameyî yew nuqta ke cinîyî hinî wayrîvejîyayîşê heqanê xo ra wetêr semedê estbîyayîşê xo semedê ciwîyayîşî têkoşîn kenê. Her roje yew cinîye yena mirêneyene, tehdîtkerdene û raştê şîdetî yena. Nê hetî ra semedê ma yew roje nê her roje 25ê Teşrîna Peyên a.''

Dîlane Dîrayet Taşdemîre vat: ''Îqtîdaro ke ganî verê şîdetê vera cinîyan bigero, şîdetî dahîna keno normal. Wezîrê Karanê Zereyî sey malayê camî qisey keno. Wezîro ke ganî vera şîdetî tedbîr bîgero û hesabê naye bido, semedê şîdetê vera cinîyan vano 'eyb o' û  sey malayî fetva dano komelî.  Pê mesele bîyeqûnî keno ke serê wehşetî bîgero. Çîyo eyb oyo ke îqtîdar wina bêgiranî nêzdîyê şîdetê vera cinîyan beno.''

Parlementera HDPyî Dîlane Dîrayet  Taşdemîre çalakîyê TJA û Meclîsê Cinîyan  ê ke aşmêko kuçe-kuçe, keye-keye gêrenê vist vîrî û vat: ''Ma  do 25 Teşrîna Peyêne de her ca de kuçeyan de bê. Ma sey cinîyan tim têkoşîn, xoverdayîş û serewedaritiş de yê. Ma pê pîlkerdişê têkoşînî eşkenê ke şîdetî bikerê rojdemê verênî yê welatî. Îqtîdar her hetî ra hêrişê cinîyan keno. Coka ganî ma zî zafhetin xoverdayîş bikerê. Mesela qeyûman tewr zaf hêrişê destkewteyanê cinîyan kerd ke paştî danê şîdetê camerdî yê vera cinîyan. Ganî nê qeyûmî lezabeze peyser bêrê antene. Sere de cinîyî ganî şar wayîrê îradeyê xo vejîyo.''