Tirkîya de rîyê polîtîkayanê cînsîyan ê AKPyî ra her serre şîdetê vera cinîyan û kiştişê cinîyan zêdîyenê. Vervatoxa Meclîsê Cinîyan ê HDPyî Dîlane Dîrayet Taşdemîr şîdetê vera cinîyan û polîtîkayê cinîyî yê îqtîdarê AKP-MHPyî ANF rê ercnayî.

Taşdemîre vist vîrî ke îqtîdarê AKPyî de şîdetê vera cinîyan resa asta tewr berze û vat: ''Kurdîstan û Tirkîya de vera cinîyan polîtîkayê taybetî yenê xebitnayene. Nê polîtîkayî newe nîyê û dewirê AKPyî de hînî bîyî zêde. Pêro dezgehanê dewlete de polîtîkayê cînsîyî estê. Bitaybetî cinîyê têkoşerî û xoverdayoxî hedefê dezgehanê dewlete yê. Dewlete têna rolêk dana cinîyan; domanan weyekerdiş û xizimkarîya camêrdan. Tirkîya seba ke destkewteyê cinîyan çin bikera vurnayîşê qanûnî kerd.''

Taşdemîre bale ante ser ke wextanê peyênan de cinîyî yenê vînkerdene û cenazeya înan zî nêna dîyene. Taşdemîre wina dewam kerd: ''Reyna cinîyî hetê dewlete û terefgîranê ci ra yenê îstîsmarkerdene. Dewlete bitaybetî Kurdîstan de na polîtîka xebitnena û êyê ke na polîtîka anê ca leşker, polîs û karmendê dewlete yê. 40 serran ra nata na polîtîka danê dewamkerdene. Nê rojan de bi taybetî cinîyê ciwanî û domanî yenê hedefkerdene.

Dêrsim bi hawayêkê taybetî sey herêma polîtîkî ame weçînayene. Zanîngehê Munzurî de cinîyî hedef de yê. Bitaybetî wendekarê feqîrî yenê weçînayene. Reyna Mêrdîn, Wan, Cizîr û Amed de nê polîtîkayî yenê xebitnayene. AKP wazena sîstemê serdestîya camêrdan awan bikera. Nê sîstemî de rolê cinîyan zî koledarî yo. Her cayê dinya de nê polîtîkayî sey ci yê. La her ca de têkoşînê cinîyan zî dewam keno.

Têkoşînê cinîyan têna seba cinîyan ney komelkî yo. Çunke têkoşînê komelî bi cinîyan hîna bihêz bena. Dewlete naye nêwazena û cinîyan hedef mojnena. Camêrdî dişmenîya cinîyan kenê, her çi kenê û dewlete pawenê.Camêrdê ke cinîyan qetil kenê mehkeme de bi xoradayîşê kravatan xelisîyenê. Dewlete camêrdan efû kena, cinîyan sucdar vînena. Sîstem zî tewr cinîyan nêpaweno, eqsê ci qetil keno. Ganî cinîyî vera nê polîtîkayan yew bibê û hîna zêde xo rêxistin bikerê.''