Têgêrayîşê Cinîyan ê Kurdan ê Ewropa (TJK-E) semedê pawitişê îrade û cuyeya cinîyan 24ê sibate de komxebeta perwerdeyî kerde û qerarê muhîmî girewtî.

Komxebata ke bi şîarê  “Jin bi zanista cewherî îrada xwe û jiyana xwe diparêzin!” ameye organîzekerdene leteyêkê hemleya ''Ma bi Jin, Jiyan, Azadî ver bi şorişê cinîyan rayra şinê'' ya ke hetê têgêrayîşê cinîyan ra ameye destpêkerdene.

Bi na komxebate yeno waştene ke xebetê perwerdeyî yê ke xeylêk wexto binê serbanê TJK-E de Ewropa de yenê kerdene wa sey karê akademî bikirişîyê merhaleya bîne. Komxebate  de binê çar sernameyan de qiseykerdişî ameyî kerdene û netîceyê muneqaşeyan de xeylêk qerarî ameyî girewtene û planî ameyî kerdene.

Komxebete de nê erjnayîşî vejîyayî vernî: ''Bi xebatanê perwerdeyî ma eşkenê xo pênas bikerê û hetê bînî eşkenê qerar bîgerê ke ma senî wazenê biciwîyê. Ma bi perwerdeyî eşkenê zîhnîyetê komelê îqtîdarkar, cinsîyetperest û hîyerarşîkî ra xo bipawê. Têna bi xebetanê perwerdeyî ma eşkenê problemanê xo pênas bikerê û înan çareser bikerê. Seba ke perwerdeyî ra netîce bêro gierwtene ganî metodê perwerdeyî afinayox bê. Nê hetî ra tewirê perwerdeyî yê Rayber Apoyî muhîm o ke rayîr ramojneno.''

Çarçaweya hazirîya komxebete de 200 cinîyan reyde anket ame kerdene û netîceyê nê ameyî erjnayene. Nunaqeşeyan de muhîmîya xebata perwerdeyî ameyî destgirewtene û ame vatene ke perwerde hem hetê fikîryayîşî, hem hetê hîsî û hem zî hetê hişmendî û moralî ra hêzdar keno. Cinîyan vat coka ganî semedê cinîyan, domanan, ciwanan û komelî xebatê perwerdeyî  bêrê kerdene. Tewr zaf zî averberdişê sîstemê perwerdeyê akademîkî ser ame vindertene.

Peynîya komxebate de seba ke bir ruhê seferberîye xebatê perwerdeyî berê kerdene, qerarê muhîmî ameyî girewtene û semedê caardişê nînan planî ameyî kerdene.