Meclîsê Cinîyan ê HDPyî çarçewa bernameyê têkoşînê dewrê neweyî yê HDPyî de Dêrsimî ra dima vizêr Anqara de cinîyan ê elewîyan reyde kombîyayîşêk kerd. Vervatoxa HDPyî Ebru Gunay, wekîle Fîlîze Kerestecîoglu û Gulistane Kiliç Koçyîgît tewrê bernameyî bîyî.

Gunaye kombîyayîşî de qisey kerd û vat: ''Ziwan, kultur, vîr û bawerîya ma se beno wa bibo paştdayîşê ma do ma bîyaro ca. Ez Seyîd Riza, Besê û înanê ke seba dewa xo ver da bi hûrmetî yad kena. Komel cinîyan ra tay çîyan paweno la ma benê hedefê tedayan. No îqtîdar wazeno cînsîyet, şeklê cuye, kinc û weçînayîşanê ma rê tehakum bikero, ma zereyê keyeyan de hepis bikero. No îqtîdar sûcdaran bêceza verdeno. Ma perçeyêkê serewedaritişê cinîyan ê.

Îqtîdarê AKPyî yê 18 serran de 7500 cinîyî kişîyayî, 10 hezar cinîyî maruzê tacîzî û 200 hezar cinîyî zî maruzê tecawuzî bîyî. Ma aqîbetê Gulîstane Doku hema zî nêzanenê. La wa ganî bizanîyo ke ma do sîstemê camêrdan çin bikerê û cinîyî do ser bikewê.

Wazenê sîstemê hemserekîye krîmînalîze bikerê û cinîyan teberê sîyasetî de verdê. Hemserekîye hêzê xo azadîya cinîyan ra gêna. No tecrubeyê ma pêro dinya rê beno îlham. No îqtîdar wazeno nê sîstemê ma çin bikero û hêrişê dezgeh û kooperatîfanê ma keno.Ma do destûr nêdê ke Peymana Îstanbulî, hemserekîye û heqê nafaka destê ma ra şorê. Nê hêrişî ma kenê hêzêr. Ma hol zanenê ke têkoşînê cinîyan û paştdayîşê cinîyan do nê îqtîdarî birijnê. Bi xoverdayîşî ma do cuya newîye awan bikerê. Rayîr têna têkoşîn o. Ma do menga teşrîna peyêne de meydanan de bê.''