Wendekara Zanîngehê Munzurî Gulîstane Doku ra 5ê çeleyê 2020î ra nata xeberêke nêna girewtene. Dosyaya tehqîqatê serebûtî de qewimîyayîşêko newe est o.

Gulîstane Dokuya ke tewr peyêne sînyalê telefonî ci Vîyadukê Sari Saltukî ra amebi girewtene, dîmenê ê cayî yê 3,5 saetan seba ke bêrê zelalkerdene erşawîyayî Buroyê Krîmînalî yê Neteweyîyî.

Avûkatê keyeyê Dokuyî Alî Çîmenî bale ante girîngîya dîmenan ser û vat: ''Eke nê dîmenî bibê zelal, do eşkera bibo ke Gulîstane pirdî ra agêraya yan nê. Goreyê netîceyanê nê dîmenî verê tehqîqatî beno ke bivurîyo.''