Têgêrayîşê Şorişî yê Yewbîyayeyî yê Cinîyan bi wesîleya 25ê Teşrîna Peyêne Roja Paştdayîşî û Têkoşînê Vera Şîdetê Serê Cinîyan, PAJKî reyde roportajêk kerd. Roportaj wina yo:

''Bi nêzdîbîyayîşê 25ê Teşrîna Peyêne şima polîtîkayanê şîdetî yê AKP-MHPyî senî ercnenê?

Seba ke şîdetê vera cinîyan bêro dîyene 25ê teşrîna peyêne vurîya tradîsyonêkê girîngî. Bi nê tradîsyonî têkoşînê cinîyan her serre aver şino. Her çî ra ver îdeolojîya rêxistina mafya ya AKP-MHPyî şîdet est o. No îqtîdar sey rêxistinêka NATO-Gladioyî awan bîye. AKP-MHP partîyêke ra zêdeyêr rêxistina şîdetî ya. Proseso ke îqtîdarî bi hêrişanê vera Rayberîye û gerîlayan dabi destpêkerdene, vera têkoşînê cinîyan zî dîya destpêkerdene. Ganî rêxistinîyan cinîyan komelî rê biba hêvî û dormeyê dînamîkanê şorişgêran de bêrê pêser. Cinîyî wayîrê îmkanan ê ke xo rêxistin bikerê, pîl bikerê û têkoşînê xo bivurnê şorişêkê radîkalî. Seba caardişê sosyalîzmî her wextî ra zêdeyêr îmkanî est ê. 

Vera terorê camêrd-dewlete seba têgêrayîşanê cinîyan xoverdayîş û paştdayîşêko senîn ameyî rêxistinkerdene?

Goreyê doneyan dinya de saetêke de 5 cinîyî yenê kiştene. Yanî her serre 43.000 cinîyî yenê kiştene. Aya ke kişîyayîşê cinîyan zêdînena dewlet a. Coka cînayetê cinîyan sey qirkerdişê cinîyan pênas benê. Têkoşînê cinîyan her serre beno wayîrê tecrubeyan û xo aver beno.

Waştişê heqanê têdûştan de cigêrayîşanê mîyanê sîstemî de vurîyayîşî qewimîyayî. Ma sey PAJKî bi serran o vanê ke ganî cinîyî mîyanê sîstemî de nêgêrê çareserîyêke. Sîstemê dewlete yê camêran destkewteyanê cinîyan eşkeno şewêke de xesp bikero. Peymana Îstanbulî mîsalê ney o. Dewlete bi xo kiştoxa cinîyan a coka nêeşkena cinîyan bipawa. Ganî cinîyî têkoşînê azadîye û heqanê xo de bibê wayîrê perspektîfê şorişî. Hînî wextê ci ameyo ke waştişê têdûştîye bivurîyo waştişê şorişê cinîyan.

Cinîyî teyna seba xo ney seba waştişanê komelî zî serkêşîye kenê. Na noqtaya girînge têkoşînê cinîyan û komelî yew keno. Xelisîyayîşê cinîyan hewceyê rêxistinîyêka daîmî yo. Nê hetî ra Konederalîzmê Cinîyan o ke KJKyî nabi ro, girîng o. 

Seba berzkerdişê têkoşînê şorişî yê yewbîyayeyî şima senî venga têgêrayîşanê cinîyan danê?

Sîstem mîyanê krîzan de yo. La îmkanê ma est ê ke têkoşînê heqanê cinîyan, bindestan û şaran bivurnê şorişêkê komelkîyî. Stratejîya Rayîrê 3. cewabê ma yo raşt o. Eke ma nêwazenê tewrê polîtîkayanê dewletanê neteweyîyan ê serweran bibê û ser bikewê ganî ma rayîrê xo dîyar bikerê, rayîrêkê neweyî abikerê. Vera qirkerdişanê cinîyan bi hişmendîya xopawitişî xorêxistinkerdiş girîng o. Milîsanê ma Tirkîya û Vakurê Kurdîstanî de xo rêxistin kerd, ê eşkenê camêrdanê ke cinîyan qetil kenê ceza bikerê.

Hetê stratejîkî ra sey rêxistinîye xeta ma rayîro 3. o. Destkewteyê na xete hetê şarê kurdî ra Şorişê Rojawanî de visîyayî destî. Coka Şorişê Rojawanî girîng o. Her wextî ra zêdeyêr îmkanî est ê ke ma cinîyanê cîyayan de bibê yew û şorişê globalî yê komelkîyî serkêşîya cinîyan de bîyarê ca. Wexto ke sîstem mîyanê krîzî de yo demokrasîya sexte ya burjuvazî bin şîya her ca de cinîyî sere wedarnenê KBDH her wextî ra zêdeyêr eşkeno rolê xo yê serkêşîye bîyaro ca, bibo hêzêkê globalî.