Kongreya Starî esas kerd ke xo bi projeyê Konfederalîzmê Demokratîkî rêxistin bikera. Kongreya Starî nika pê têkoşînê xo resena cinîyanê dinya.

Endama Koordînasyonê Kongreya Starî Cîhane Hisên derheqê macera û xebatanê Kongreya Starî de ANFyî rê qisey kerd.

Cîhane Hisên vist vîrî ke Yewîya Starî 2005î ra heta 2016î xebatê xo bi xurtî kerdê û dima seba ke cinîyî hîna bi xurtî xo rêxistin bikerê Yewîya Starî xo vurnaya kerda Kongreya Starî. Cîhane Hisên pare kerd ke Kongreya Starî armanc kerd ke xo biresna pêro keyeyan û bi nê hawayî zî komelî rêxistin bikera. Cîhane Hisên ard ziwan ke asta pawitişî de YPJ zî parçeyêkê sîstemê Kongreya Starî yo.

Cîhane Hisên vat: ''Kongreya Starî seba ekonomîya cinîyan serkêşîye kerde; xeylêk waran de seba xodevirnayîşê cinîyan projeyî aver berdî. Nika ma armanc kenê ke dewan de seba xodevirnayîşê cinîyan projeyanê îstîhdamî awan bikerê. Komîteya Perwerdeyî zî seba hişmendkerdişê cinîyan, vilakerdişê Jineolojî zaf kede daye. Sîstemê ma yê perwerdeyî seba vurnayîşê hişmendîya pederşahîye û awankerdişê keyeyêkê demokratîkî xebatan keno. Sîstemê perwerdeyî bi nê hawayî hedefê dişmenî zî pûç keno.''

Cîhane Hisên bale ante ser ke netîceya destkewteyanê Kongreya Starî de Meclîsê Cinîyan ê Rojawanî ronîyayê û vat: ''Pêro partî, dezgeh û rêxistinê cinîyan binê nê meclîsî de ameyî pêser. Welatanê Ewropa, Lûbnan, Başûrê Kurdîstanî û Şam de zî temsîlkarîyê ma est ê. Ma kenê ke xo biresnê pêro cinîyanê dinya. Kongreya Starî xo oê projeyê Konfederalîzmê Demokratîkî rêxistin kena û serkêşîya cinîyanê herême kena. Ma hînî resayî a aste ke xîtabê cinîyanê dinya kenê. Seba ney zî ganî ma hîna zaf xîret bikerê.''