Zîndanan de binpaykerdişê heqanê merdiman dewam keno. Pê qanûnê înfazî yê AKP-MHPyî zî tepişteyê nêweşî zîndan de vera dîyayî. Vera na rewşe nêrazîbîyayîşî dewam kenê. Tepişteya Zîndanê Gebze Havva Ak nêweşa kanser a. Wasîyê aye Sînan Sayanî pare kerd ke ganî tepişteyê sîyasîyî bêrê veradayene.

Havva Aka 48 serre  lîsteya 74 tepişteyan ê nêweşan a ÎHDyî de ya. 4 serrî verê cû Havva de kanserê çijeyî vejîya. Rewşa weşîye ya Havva xirab a ke tede rîskê kanserê rahîmî zî esto. Wasîyê Havva Ak Sînan Sayanî bale ante rewşa weşîye ya tepişteyan û vat: ''Serra 2004î de dewleta Sûrîye Havva Tirkîya rê teslîm kerde. Havva kanser a û nêna weşkerdene. Ganî her 3 mengan de rayêk şora nêweşxane la rîyê vîrusê Korona ra nêeşkena şora. Mengêke ra zêdêr zî derman nêdîyeno ci. Seba ke vera vîrusî bêrê pawitene zîndan de seba tepişteyan tedbîrêk nêame girewtene. Şertê zîndanan seba tepişteyanê nêweşan hol nîyê.  Îqtîdarî seba terefgîranê xo paketa înfazî ya 3. vete. Bi nê hawayî tepişteyê nêweşî terkê mergî bîyî. Ez seba embaze Havva qerqilîyena. Mi aye reyde roja pancşemeyî telefon de qisey kerd. A kena ke pê îmkananê xo vîrusî ra xo bipawa. Havva vat ke îdareyê zîndanî vera vîrusî tedbîrêk nêgirewto.''