Endamê Heyetê Rayberdişî yê Hemserekîya PYDyî Aldar Xelîlî derheqê peymana mabênê QSD û Îdareyê Şamî, qirkerdişê elewîyan, zîyaretê Şamî yê Tirkîya û têkoşînê şaran de ANFyî rê qisey kerd.

Xelîlî vist vîrî ke peymana mabênê QSD û Îdareyê Şamî 8 madeyan ra yena pê û vat: ‘’Ma peymane de dîyar kerd ke şorişî ra nata ma parçeyêkê Sûrîye yê û armancê ma awankerdişê Sûrîyeya demokratîke yo.  Girîng o ke bi na peymane komîteyê leşkerî, îdarî, ekonomîk û dewaya kurdbîyayîşî do bêrê awankerdene. Nameyê Sûrîye yo newe seba ma girîng o.ç Colanî û koma ci name sey ‘Komara Ereban’ dîyar kerdibi la ma no qebul nêkerd.

Ma şerî nêwazenê la xora vera hêrişan ma do xo bipawê. Ma wazenê ke adirbirnayîşêk bêro viraştene. Goreyê na peymane ganî Îdareyê Şamî hêrişanê vera Rojawanî de zî bi mesuldarî têbigêro. Na rewşe de ganî dewleta tirke cayanê îşxalkerdeyan ra xo bianca. La hema zî hêrişê dewleta tirke dewam kenê.’’

Xelîlî îfade kerd ke qirkerdişê vera elewîyan nêno qebulkerdene û vat: ‘’Nê hêrişê vera elewîyan sey hêrişanê DAÎŞî yê vera Şingalî yê. Ganî vera nê hêrişan têkoşîno hempar bêro kerdene. HTŞ wina mojneno ke elewîyî terefgîrê rejîmê Baasî yê. La wina nîyo. Elewîyî zî mexdûrê rejîmî yê.’’

Xelîlî da zanayene ke Qanûno Bingeyî 105 serrî yo û vat: ‘’Ganî no Qanûno Bingeyî bêro vurnayene. Peymana mabênê QSD û Şamî tay prensîbê ma zelal kerdî. La ma ancî zî seba Qanûnê Bingeyî yê demokratîkî têkoşînê xo rê dewam bikerê. Dewleta tirke kena ke bi masîpulasyonan Şam şertanê Îdareyê Xoserî qebul nêkero. Coka Tirkîya Şam zîyaret kerd. 

Şarê Sûrîye paştî danê Îdareyê Xoserî û modelêkê sey Rojawanî wazenê. Oyo ke temsîlkarîya Sûrîye keno no proje yo. Oyo ke rewşa taye de yo îdareyê Şamî yo. Heya rejîmê Baasî rijîya la meseleyî hema zî nêameyî çareserkerdene. Sûrîyeyêka demokratîke ancax bi projeyê neteweya demokratîke, bi hişmendîya cinîyan ê azadan û yewîya şaran îdare bena. Ganî her kes seba ney têkoşîn bikero.’’