Vakurê Kurdîstanî û Tirkîya de şîdetê vera cinîyan zêdîyena. Vakurê Kurdîstanî de êriş, tecawuz û kişîyayîşê vera cinîyan mojnenê ke dewlete polîtîkaya qirkerdişê komelkî viste dewre. Beşê diyînî yê dosyaya ma de ma ca danê ercnayîşê Zelale Bîlgîn.

Zelale pare kerd ke cinîyî nê çaxî de merkezê vurnayîşê komelkî, kulturel û sîyasîyî de yê û vat: ''Sîstemê dewlete pê naye qayîl nîyo. Kurdîstan de hîşmendîya cinîyan a xoverdayox, têkoşer esta ke îtîrazê xo kena.Dewlete bi sîyasetê xo yê şerî xeylêk kesê ke ni huqûqê dişmenî perwerde bîyê, erşawitî Vakurê Kurdîstanî. Bi rayîrê nê hêzî ge hîsê nîjadperestî ge zî tecawuz û tacîzê cinîyan yenê kerdene. Êyê ke nê pêroyînan kenê û bi hîşmendîya 'mi rê çîyêk nêbeno' têgêrenê mojnenê ke senî yew xizmet kenê.''

Zelale vist vîrî ke Têkoşînê Azadîya Cinîyan ê Kurdîstanî resa a astêka enternasyonalîste û vat: ''Ma sey cinîyan ê kurdam wexto ke naye ercnenê bi hêzê vurnayîşî ercnenê. Cinîyê kurdî canê xo ra fek vera danê la teslîm nêbenê.Ma û têgêrayîşo femînîst ê Tirkîya tay noqtaya ser pêkenê la tay noqtayan de mabênê ma de nakokîye virazîyena. Têgêrayîşo femînîst ê Tirkîya serebûtanê Kurdîstanî bi hawayêkê raştî nêercneno. Ma seba nasnameyê xo yê neteweyîyî zî têkoşîn kenê. 

Kesê biunîformayî Tirkîya de bi wezîfeyê pawitiş û asayîşî têgêrenî la Kurdîstan  de şîdet û tecawuz kenê. Na mesele ser o ma û femînîstê tirkî pê nêkenê. Wexto ke Tirkîya de cinîyî kişîyenê medya medya pêro çîyan weşanena la wexto ke Kurdîstan de cinîyêke kişîyena çapemenîye zaf tay ca dana ci.''

Zelale bale ante hêrişanê qirkerdişê komelkîyî ser û vat: ''Nê hêrişî têna Kurdîstan de qewimîyenê. Tirkîya de vera muxalîfan hêrişê qirkerdişê komelkîyî yenê kerdene. Wina bîyo ke çew nêeşkeno qisey bikero. Dewlete dewleta polîs, leşkeran û şîdetî ya. Êyê ke wezîfedarê asayîşî yê heman wextî de seba komelî tehluke yê.''