TJA û Meclîsê Cinîyan ê HDPyî programê 8ê Adare Roja Cinîyan ê Kedkeran a Dinya eşkera kerd.

Programê 8ê Adare de, TJA 25 sibate de bi sloganê ‘Paştîdayîşê cinî, cuy a’ û Meclîsê Cinîyan ê HDPyî zî 26ê sibate de bi sloganê ‘Me tena nîyê, pîya yê/Jin Jiyan Azadî’ da destpêkerdene. Programî do 10 bajaran ra ke erdlerz tesîr kerdo, bêrê viraştene.

Cinîyê TJA û HDPyî do bi kamyonanê hetkarî yê MORan seba ke hetkarîya cinîyanê mexdûran bikerê, herêma Ege, Marmara, Anatolyaya Mîyanêne, Serhed û Amed ra rayîr bikewê û şêrê Hatay, Dîlok, Mereş, Semsûr, Meletî, Riha, Edene, Amed, Kîlîs û Osmanîye de çalakîyanê paştîdayîşan bivirazê.

Programê 8ê Adare yê TJA û Meclîsê Cinîyan ê HDPyî wina yo:

- Cinîyê TJA, êyê ke Serhed de yê, bi Parlamentera HDPyî Dîlane Dîrayet Taşdemîr, Gulîstane Kiliç Koçyîgît û Şevîne Coşkun do 1 adare de Meletî de bibê.

Cinîyê TJA, êyê ke Herêma Ege de yê, bi Parlamentera HDPyî Tulaye Hatîmogullari û Serpîle Kemalbay 3ê adare de Hatay de bibê.

-Bi beşdarbîyayîşê Hemsereka Pêroyî yê HDPyî Pervîne Buldan, Vervatoxa Meclîsê Cinîyan Ayşe Acar Başaran û heyetê HDPyî yê cinîyan do 4ê adare de Hatay de bibê

- Cinîyê ke bajaranê Anatolyaya Mîyanêne de yê, bi Serekwekîla Grûba HDPyî Merale Daniş Beştaş, Parlamenter Fîlîz Kerestecîoglu û Mûazzeze Orhan 4 adare de Dîlok de bibê.

Cinîyê ke Herêma Marmara de yê, bi Parlamentera HDPyî Oya Ersoy, Huda Kaya, Zuleyha Gulum û Dilşate Canbaz 6ê adare de Mereş de bibê.

-Cinîyê TJA, bi beşdarbîyayîşê parlamentera HDPyî Feleknase Ûca 1ê adare de Batman ra, bi beşdabîyayîşê Wekîl Dêrsime Dag û Remzîye Tosun 3ê Adare de Amed ra, bi beşdarbîyayîşê Wekîl Nûrane Îmîr 5ê adare de  Sêrtî ra, bi beşdarbîyayîşê Vervatoxa HDPyî Ebrû Gunay û Wekîl Pero Dundar 4ê adare de Mardîn ra ver bi Semsûrî rayîr bikewê.

- Çarçewayê programî de Hemsereka Pêroyî yê HDPyî Pervîne Bûldan do 7ê adare de Kombîyayîşê Grûba Cinîyan ê Parlamentoyî de qisey bikera.

- Bi rayberîya TJA, 8ê adare de Wan, Batman, Sêrt, Şirnex û Mardîn de do rayraşîyayîşî bêrê kerdene. Û xeylê bajaran ra do bi beşdarbîyayîşê TJA, Meclîsê Cinîyan ê HDPyî û platformê cinîyan eşkerayîye bêra dayene.