Îdareyê TJK-E derheqê serebûtî de eşkerayîyêka nuştekîye weşanaye. Eşkerayîya TJK-E wina ya:
''Multecîya kurde ya rojawanije Evîne Ekrem hêrişê Tirkîya-DAÎŞî yê vera Rojawanî de warê xo terikna û neçare mende ke bi domananê xo koç bikera. Evîne kampa Lavrio ya Yunanîstanî de verê çimanê domananê xo de hetê mêrdeyê xo ra ameye qetilkerdene. Ma nê kiştişê barbarî û sîstemê dewlete yo ke kiştoxan paweno bi hawayêkê xurtî şermezar kenê.

Serebût 29ê çeleyî de şaristanê Lavrio de kampa multecîyan a bînaya qereqolê polîsan de qata corine de ame meydan. Multecîya rojawanije Evîne Ekrem (35) hetê mêrdeyê xo ra ameye kiştene. Kiştoxo ke serebûtî ra dima rema hetê multecîyanê kurdan û polîsan ra ame tepiştene. Evîne Ekrem Qamişlo ra bîye û dadîya 4 domanan bîye.

Kiştişê cinîye têna keyeyêk de yan zî mîyanê şarî de nêqewimîyeno, heman wextî de dewlete rayberîya nê faşîzmê cînsî kena. Şîdet têna vera cinîye ney vera pêro komelî yeno kerdene.

Şîdetê vera cinîyan mesele û rojdemo bingeyî yê pêro dinya yo. Seba çareserkerdişê nê mesele ganî cinîyî cîyatîya ziwan, bawerî, nîjad û etnîkî ca verdî û pîya kom bibê û wyrzê payan ser. Vera naye hewce yo ke têkoşînêko hempar bêro kerdene. Cinîyî bi têkoşînê rêxistinbîyayeyî û yewîye eşkenê na mesele çareser bikerê.

Vera nê şîdetê îqtîdarê dewlete û serdestîya camêrdan ma venga pêro cinîyan û vamêrdan danê ke vera kiştişê cinîyan wurzê payan ser, vengê xo berz bikerê."