TJK-E eşkerayîyêke weşanaye û pare kerd ke ê 25ê Teşrîna Peyêne Roja Têkoşînê Vera Şîdetê Serê Cinîyan ra dima dest pê kampanya kenê.

Eşkerayîye de ame parekerdene ke seba cuya azad û têdûşte vera sîstemê kapîtalîzmê seksîstî Kurdîstanî ra heta Amerîka, Şîlî, Polonya û Ewropa cinîyî bêmabên xoverdayîşê xo dewam kenê.  Eşkerayîye de ame vatene ke bi taybetî Rojawan, Şingal û Sûrîye de Rojhelatê Mîyanênî de sûcê tewr pîlî yê vera cinîyan hetê dewleta tirke û Erdoganî ra yenê kerdene.

Eşkerayîya TJK-E wina dewam kena: ''Xeylêk şaristananê Tirkîya û Kurdîstanî de vera cinîyan şîdet yeno kerdene, tecawuzê cinîyan ame kerdene û cinîyî kişîyenê. Kurdîstanî de cinî û domanî yenê qirkerdene û nê qirkerdişî hetê teyarayanê şerî yê dewleta tirke ra yenê kerdene. Hêzê dewleta tirke vera cinîyan ê kurdan polîtîkaya şerê taybetî anê ca. Hînî wextê ci ameyo ke ma rejîmê faşîstî ra hesab bipersê.

Ma sey TJK-E vera qirkerdişê cinîyan bi rayîrê kampanyaya xo ya bi nameyê '100 sebebê seba hukmkerdişê dîktatorî' ma do Erdoganî ra hesab bipersê ke berpirsîyarê qirkerdişê cinîyan o. Hetê bînî ra ma do dezgehanê mîyanneteweyîyan ra bi taybetî Neteweyanê Yewbîyayeyan ra biwazê ke femicide sey qirkerdişêkî şinasîyo.

Ma bi kampanyaya xo wazenê ke bale biancê polîtîkayanê qirkerdişê cinîyan ê AKPyî ser û sûcanê vera cinîyan rayaumûmîya dinya rê pare bikerê. Ma wazenê hînî AKP bêro hukmkerdene û edalet wa bêro caardene.

Kampanyaya ma '100 sebebê seba hukmkerdişê dîktatorî' 25ê teşrîna peyêne de do dest pêbikera û heta 8ê adara 2021î dewam bikera. MA do her roje hîkayeyanê cinîyanê ke kişîyayî şima reyde pare bikerê û ma do vera dîktatorî bibê vengê nê cinîyanê kişteyan.  Reyna ma çarçewa kampanyaya xo de 100 hezar îmzayan do arê bidê.

Ma do sey TJK-E kampanyaya xo ya bi şîarê 'Vera qirkerdişê cinîyan pawitişê komelê azadî' 25ê teşrîna peyêne de pêşkêş bikerê. Nê esasî ser o ma do her meydan de çalakîyan bikerê.

Heta ke qirkerdişê cinîyan sey sûcê merdimîye nêro şinasnayene ma do nêeşkê netîceyêke bigêrê. Nê esasî ser o ma venga pêro cinîyan danê ke tewrê kampanya û çalakîyanê ma bibê.''