Meclîsê Cinîyan ê DEM Partîye bi rojdemê weçînayîşî merkezê pêroyî de kombîyayîş keno.

Hemsereka Pêroyî ya DEM Partîye Tulaye Hatimogullari destpêkê kombîyayîşî de qisey kerd.

Tulaye Hatimogullari bale ante ser ke tepişteyê sîyasîyî vera tecrîdê serê Rayberê Şarê Kurdî Abdullah Ocalanî grevê vêşanîye kenê û vat:

''Tepişteyî seba ke tecrîdê Îmraliyî wedarîyo, meseleya kurdan bêra çareserkerdene grevê vêşanîye de yê. Dadîyî zî teber de nobeta edaletî kenê. Ez nobeta dadî û cinîyan û grevê vêşanîye yê tepişteyan selam kena. Tecrîd sûcê vera merdimatîye yo, ganî wedarîyo. Verî ke tabloyê grevê vêşanîye giran bibo ganî waştişê tepişteyan bêrê caardene. Wa waştişê haştîye yê dadîyan bêro caardene.

Îqtîdarê AKP-MHPyî seba qesasî hêrişê cenazayan keno. Seke zanîyeno 8ê teşrîna peyêne de endamanê ma yê Meclîsê Ciwanan wexto ke nê hêrişî protesto kerdêne ê ameyî derbkerdene. Temsîlkara Meclîsê Ciwanan Edanure Îbrahîmoglu dima ameye destbendkerdene û îşkenceyêko giran dî. Ma vera nê şîdetî heta peynî hetê Eda de yê.

Meclîs de ancî serkêşîya îqtîdarî de seba budçeya 'camêrdan û şerî' amadekarîye est a. Ma vera budçeya îqtîdarî budçeya xo ya demokratîke pêşkêş kerde. Ganî budçeya 2024î biba budçeya cinîyan. Ma seba caardişê ney soz danê. Ma do wayîrê nanê xo, keda xo û karê xo vejîyê.

Rojdemê welatî weçînayîşê herêmî yê. Ma do nê weçînayîşan de şaredarîyanê xo destê qeyûman ra apey bigêrê û şaredarîyanê xo ancî bivisnê binê xizmetê cinîyan. Îqtîdar wa bizano ke cinîyî do qetî wayîrê şaredarîyanê xo vejîyê. Ma ancî venga pêro cinîyan danê ke bêrê DEM Partîye ra namzetîya xo bimojnê.

Wextê nê îtîdarî de cinîyî tim yenê qetilkerdene. La ma do vera nê cînayetan têkoşînê xo ra fek vera nêdê. Ma do tim haştîye biwazê û seba haştîya Rojhelatê Mîyanênî bixebitê. Ma do destkewteyanê xo heta peynî bipawê. Ma do est bê. Jin, Jiyan, Azadî.''