Endama Komîteya Merkezî ya PKKyî Hêlîne Umît Medya Haber TVyî de cewab da persanê Serdar Erenî.Qiseykerdişê Hêlîne Umît ra qismêk wina yo:

''Komelê Kurdîstanî de raştîya Zîlane sey çimeyê moralî dewam keno. Girêdayîşê embaze Zîlane yê cuye zaf eceb o.  Gama ke xîtabê Rayberîye kena, vana, 'Ez cuye û merdiman ra zaf hes kena, ez wazena bibe wayîrê cuyeya bimana û çalakîya girde.' Ma nê embaz Kemal Pîr de zî vînenî. Vano 'Ma cuye ra hende hes kenê ke semedê ci mirenî.' Embeze Zîlan bi cuyeya bimana û azade mabênê ma de bîye pirdêk. Ganî roja ma de cinî, ciwan û komelê Kurdîstanî hol fam bikero ke embaze Zîlane qalê kam yew cuye kerdêne.Wexto winayên de ke cuye hende ameya wardayene, ganî ma goştarîye vengdayîşê cuyeya azade yê embaze Zîlane bikerê. Embaze Zîlane na çalakîye semedê Rayber Apoyî kerd. Vera Rayberîye hêrişêk ame kerdene, a coka wina bi hêrsî şîyî dişmenî ser. Rayberîye ma bi serran o binê tecrîdî de yo û 40 mengî yo tira xebere nîna girewtene. Partîbîyayîşê cinîyan de embeze Zîlane manîfesto ya. Na çarçewa de ez veng dana ke wa heme hemrayê cinî û camêrdî  embaze Zîlane raşt fam bikerê.

16ê gulane ra nata şerî de dewrê bînî dest pêkerd. Vera Metîna şero gird yeno kerdene. Îşxalkerî xo mewzîyanê PDKyî de ca kenê. Şerê ma yê estbîyayîş û çînbîyayîşî de têkoşîno stratejîk yeno rayraberdene. Îşxalî ra cîya îlhak yeno manaya yew cayî parçeyêxokerdişî. Tirkîya sere de Musul û Kerkuk heme waranê kurdan de heq îdîa kena. Nê cayî sey Misak-ı Milli pênas kerdî. Sey argumanî PKKyî şuxilnena. Heta zereyê Başûrî wina ameye. Tay sîyasetmedarê Başûrî û roşnvîrê Iraqî vera nê tewir genê.

Başûrê Kurdîstanî de raştîya komelêkê welatperwerî est a. Seba ke serkêşê ci çîn o hend veng nêvejeno. Artêşa tirke wazena xo Başûrê Kurdîstanî de bikero mende. Artêşa tirke Başûrê Kurdîstanî de nuqtayê kontrolî nayî ro.  Selahîyetdarê PDKyî herinda nê îzahkerdişî de pîya bi kesanê ke MÎTî rêxistin kerdî eşkerayîya hempare danê û vanê şewatê Başûrî PKKyî vetî. Sextekarîye û alçaxîye hende bena.

PDK Başûr sey mulkê xo vîneno, cayê ke qaçîka tede hakîm o, ûca de xizmetê dewleta tirke keno. Eke ewro dewleta tirke wina rehet Metîna, Amêdîye  û Duhok de gêrana  no rîyê PDKyî ra yo. PDK pîya bi qetilkaranê kurdan tekîlîya îxanetî aver beno. Ma do destûrê îşxalî medê. PKK têna rêxirstina Vakurî nîya, PKK rêxitina netewa demokratîke ya komelê Kurdîstanî ya. Vera kayê ke Başûrê Kurdîstanî de yeno waşteneke bêro kaykerdene ganî komelo demokratîk wirzo payan ser. Başûrê Kurdîstanî de ganî şar dahîna radîkal vera PDK û dewleta tirke vejîyo.''