Endama Komîteya Merkezî ya PKKyî Hêlîne Umît Medya Haber TVyî de bîye meymana Bernameyê Taybetî û rojdem ercna. Qiseykerdişê Umîte ra beşêk wina yo:

''Dewleta tirke 17ê nîsane de newe ra hêrişî dayî destpêkerdene. Ma nê hêrişî pawitêne. Ma hê serra 50. ya Rayraşîyayîşê Partîye de yê. 2015 de dewleta tirke pê operasyonêkê tasfîye kerd ke ma çin bikera. La nêeşkaye. 2018 de Amerîka vera 3 embazanê ma qey tepiştişê înan dîyarîya pereyî naye ro. Prosesêkî zî wina dest pêkerd. Operasyonê Garê zî bingeyê konseptê mîyanneteweyî de ame kerdene. La ê Garê de zî bin kewtî. Gerîlayan 2021 de bi ruhê serkewtişê Garê vera hêrişan xo ver da. Dewleta tirke bi sereyê xo nê planan nêkena. NATO bi xo plansazîya nê hêrişan keno. Par zî dewleta tirke pê plansazîya NATOyî hêrişê Avaşîn, Metîna, Zap û Girê Sorî kerd û reyna raştê xoverdayîşî ameye. Nika zî nê konseptê şerî ser o ê hêrişê ma kenê.

Seba ke şarê kurdî neteweya demokratîke de, statuyê şaranê demokratîkan de israr keno, nê hêrişî yenê kerdene. Ma 50 serrî yo têkoşîn kenê. Nê hêrişî armanc kenê ke destkewteyanê nê 50 serran çin bikerê. Dewleta tirke hetêkî ra hêrişê Herêmanê Pawitişî yê Medya, hetê bînî ra zî hêrişê Rojawan û Şingalî kena. Seba ke PKK temsîlkarîya neteweya demokratîke ya kurdan kena yeno waştene ke pê nê hêrişan bêro tasfîyekerdene. PKKyî ra nêbo hêzê kolonyalîstî resenê armancanê xo. Wa çew mevajo ke cara gerîlayî hê xo ver danê, ma eşkenê pê xoverdayîşê gerîlayan netîce bigêrê. Ganî têna gerîlayî nê, pêro kurdî nê şerî de erkanê xo bîyarê ca.

Kurdîstan de seba yewîya neteweyîye ancax hetê PKKyî ra fedakarîyî ameyî kerdene. PDKyî rixmê hende vengdayîşê ma û şarê ma zî seba yewîya neteweyîye çîyêk nêkerdo. PDKyî şexsê keyeyê Barzanîyan de tarîxê Kurdîstanî de tim destek da dişmenanê kurdan. PDKyî tim seba menfaatanê xo şer kerd, seba menfaatanê şarî nê. PDK nika tarîxê Kurdîstanî de rolê xo yê tewr xirabî kay keno. Destûrê PDKyî ra nêbîyêne dewleta tirke nêeşkayêne derbazê Başûrî biba û hêrişê gerîlayan bikera. Ganî şarê Başûrî vera keyeyê Barzanîyan tewirê xo bimojno.

Eşkerayîyê şermezarkerdişî yê hukmatê Iraqî ercîyaye yê la qîm nêkenê. Dewleta tirke wazena Başûrî zî îşxal bikera û Başûr bikera sey Efrînî. Girîng o şarê Iraqî û hukmatê Iraqî ney ra hayîdar ê û vera ci tewir gênê.

Dewleta tirke hêrişê Kobanê kena û wazena wina bimojna ke a eşkena heman wextî de hêrişê cayanê bînan bikera. A raşte dewleta tirke tersena ke hêzê bînî hêrişê ci bikera. 

Embazê ma hê serkêşîya YJA-Starî de şer kenê, no seba ma sereberzî ya. Mîyanê gerîlayan de gerîlayê cinîyî xeta cuya azade temsîl kenê û hêz danê cinîyanê bînan. Gerîlayê YJA-Starî vera sîstemê serdestîya camêrdan sere wedarnenê. No zî xora tesîrê komelî keno. Şer têna mabênê PKK û dewlete de nîyo yan zî têna koyan de nîyo. Şer her ca de yo û vera pêro kurdan o. Ewro zîndanî bîyî warê qirkerdişî, şar mîyanê xizanîye de yo. Nê prosesî de serkeşîya cinîyan komelê kurdan payan ser de vindarnena. 8ê Adare û Newroze de serkêşîya cinîyan de ruho xoverdayox vejîya werte. Temsîlkarîya na xeta cinîya azade zî tewr zaf hetê YJA-Starî ra yena kerdene. 

Dewleta tirke vera erdê Kurdîstanî, bi taybetî vera Vakurê Kurdîstanî hêrişanê pîlan kena. Seba haştîyêka rûmetênî ganî kurdî, şarê Tirkîya û pêro şarî têkoşîn bikerê. Bê têkoşîn têdûştîye, edalet û azadîye nênê destvistene. Ma sey têgêrayîş û şarê kurdî pê têkoşînî destkewteyê xo vistî destî. Ma nika prosesêkê hesasî derbaz kenê. Şarê kurdî û gerîlayî hema zî bi xurtî wayîrê îmkananê xoverdayîş û têkoşînî yê. Wa çew xo sey qelsî hîs mekero. Ma do qetî faşîzmê AKP-MHPyî birijnê. Ganî şarê kurdî bi zixmî tewrê têkoşînî bibo. Nê şarî pê azadîye û Rayberîye bawer kerdo. Tay kêmasîyî zî est bê zî şar û gerîlayî eşkenê pîya şerê şarî yê şorişgêrî bikerê. Her kes eşkeno cayê xo ra derbe bido dewlete ro. Hêrişê îmha yê vera Kurdîstanî seba teslîmgirewtişê kurdan o. Estbîyayîşê kolonyalîstan sebebê serewedaritişî yo. Heskerdişê welatêkî pê pawitişê ey beno. Wa her kes mesuldarîya xo bîyaro ca.

Ez çalakîyanê HBDHyî selam kena. HBDH terefê ma de têkoşîn keno û armancê ma yew ê. Ganî bi taybetî ciwanî wayîrê HBDHyî vejîyê. 

Verê ma de 1ê Gulane est o. Ganî kedkar û karkerî vera hêrişanê serê Kurdîstanî tewirê xo bimojnê. Rayîrê demokrasîya Tirkîya azadîya Kurdîstanî ra derbaz beno. Eke şarê kurdî û şarê Tirkîya pîya têkoşîn bikerê eşkenê faşîzmê AKP-MHPyî birijnê. Ez venga her kesî dana ke 1ê Gulane de vejîyo waran.''