Ekine Ceren Dogruak û Uta Schneiderbanger yê ke Başûrê Kurdîstanî de 31ê gulana 2005î şehîde bîyî, bajarê Mulheim Ruhrî yê Almanya û Anqara de serê goranê xo de ameyî vîrardene. 

Ekine Ceren Dogruak (Amara) Goristanê Karşiyaka yê Anqara de serê gorê ci de ameye vîrardene. Keyeyê Dogruake, Wekîlê Partîya Çep a Keske yê Colemêrgî Verîz Parlak û xeylêk kesî tewrê merasîmî bîyî. Qiseykerdişan de ame vatene ke têkoşînê şehîdan do bêro domnayene û bireso serkewtişî.

Uta Schneiderbanger (Nûdem) zî Mulheim Ruhr de serê gorê xo de ameye vîrardene. Xebatkarê Merkezê Têhêtameyîşê Cinîyan ê Utamara, endamê Meclîsê Cinîyan ê Asya Yuksel yê Duisburgî û Meclîsê Bêrîvane Şingal ê Essenî û Buroyê Haştîye yê Cinyan ê Kurdan ê CENÎ ra Susanne Rossling û embazê şehîdan tewrê vîrardişî bîyî. Qiseykerdişan de ame vatene ke Uta û Amara Têgêrayîşê Azadîye yê Cinîyan ê Kurdan de  keda pîle daye ke ê do çirey nêrê vîrakerdene.