Endama Heyetê Îdareyî ya Komeleya Cinîyan a Rosa Halîme Akyol ANFyî rê bale ante weçînayîşanê herêmîyan ser û derheqê waştişanê cinîyan û rejîmê qeyûman de qisey kerd.

Halîma Akyol da zanayene ke bi qeyûman mudirîtîyê cinîyan ê şaredarîyan ameyê qefilnayene, warê îstîhdam, berardiş û têkoşînê vera şîdetî ameyê vengkerdene. Halîme vat: ''Şaredarîyanê ma de xeta Alo Şîdetî, kargehê cinîyan, kooperatîfê cinîyan est bîyî. Nê cayan de ma hetê huqûqî û psîkolojîkî ra paştî dayêne cinîyan. Qeyûman nê pêro karê ma kerdî hedef. Cinîyî seba ke warê îdareyî û sîyasîyî de bibê wayîrê vatişêkî ganî xo ra bawer bibê û tewrê cuye bibê. Şaredarîyanê ma temînatê ney dayêne. Rejîmê qeyûman ê 2015î ra dima şîdetê vera cinîyan, xokiştişî, şuxilnayîşê narkotîkî û fuhuşî zêdîyayî. Qeyûman seba cinî û ciwanan warêk nêverda.''

Halîme Akyol îfade kerd ke qeyûmî têkoşîn û paşdayîşê cinîyan kenê hedef û vat: ''Cinîyî kokê komelî yê. Coka ganî sîstemêko winayên bêro awankerdene ke cinîyî tede bieşkê qisey bikerê. Ganî ma weçînayîşanê herêmîyan de hîna zaf nê sîstemî xurt bikerê. Temsîlîya têdûşte seba ney mîsalo girîng o. Ma do weçînayîşanê herêmîyan ra pey sîstem, dezgeh û xebatanê xo yê verênan bi hawayêkê hîna bitesîrî bivisnê dewre. Ganî xebatanê şaredarîyan de kotaya têdûşte, aktîfbîyayîşê cinîyan zaf girîng o. Ma do kuçeyan de seba ke meseleyanê cinîyan çareser bikerê û pîya bihêz bê do bixebitê. Vera feraseto ke wazeno cinîyan komelî ra dûrî bikero,  ê do her ca de xo hîna zaf rêxistin bikerê.''