Endamê Komîteya Merkezî ya PKKyî Nedîm Sevenî derheqê tecrîdê Îmraliyî, peymana PDK-dewleta tirke-Iraqî û xoverdayîşê gerîlayan de ANFyî rê qisey kerd.

Qiseykerdişê Sevenî ra tay noqtayê girîngî wina yê:

''Rayber Apo 26 serran ra nata Zîndanê Îmraliyî de xo ver dano. Nê xoverdayîşî reyde komplogerî zî hêrişanê xo rê dewam kenê. Hetê bînî ra Hemleya Azadîye zî serrêke xo pey de verdaye. 69 wayîranê Nobele zî seba azadîya Rayber Apoyî mektube nuşte. Rayber Apoyî ra 42 mengî yo xeberêke nêna girewtene. Yanî hinî dayo qirixî ro. Ewro pêro dinya wayîra Rayber Apoyî vejîyeno. Sere de ê gerîlayan têkoşînê pêro şarê ma do azadîya Rayber Apoyî bîyaro ca.

Bi taybetî hîrê serran ra nata vera Başûrê Kurdîstanî hêrişê giranî yenê kerdene. Nê hêrişan de PDK û keyeyê Barzanîyan destkewteyanê şarê ma pêşkêşê dişmenî kenê. Xora tarîxê nînan bi îxanetî dekerde yo. Barzanîyan mîyanê Komployî de zî cagirewtbi. Yew eleqeyê Barzanîyan bi kurdayetîye çin o. Keyeyê Barzanîyan vera şarê kurdî, gerîlayan û têgêrayîşê ma şer keno. 

Nika dewleta tirke-PDK-Iraqî peymanêke îmza kerda. Bi rayîrê na peymana 15ê temmuze rayîr dîyeno hêrişanê dewleta tirke. Dewleta tirke ferman da û Iraqî bira qefilnayîşê PADÊ û Tevgera Azadî girewte. Axir peymana 15ê temmuze do biba sebebê netîceyanê xiraban. Dewleta tirke bi bahaneya çinkerdişê PKKyî û bi rayîrê peymananê winayênan wazena Başûrî îşxal bikera. Ganî şarê ma verê ney de hişyar bibo.

Eke gerîlayî bin bikewê, derbe biwerê sîyaseto demokratîk do nêeşko xo bileqno. Ewro xêrê xoverdayîşê gerîlayan ra şarê ma bi asayî yo. Xora gerîlayan şerê 2023yî de xo îsbat kerd. Şarê ma zî ganî bi Şerê Şarî yê Şorişgêrî hetê gerîlayan de cabigêrê. Ganî serkêşîya cinî û ciwanan de şarê ma tewrê nê xoverdayîşî bibo. 

Ha nika serrgêra Komployê 9ê Teşrîna Verêne bena nêzdî. Komplogeran vatêne qey bi nê komployî ê do PKK û Rayber Apoyî çin bikerê. La PKK 42 serrî yo bêmabên têkoşînê çekdarî keno. Xora têkoşînê sîyasetê demokratîkî girîng o. La bê şerkerdişî haştîkerdiş zî nêbeno. Ewro îqtîdarê AKP-MHPyî yo dişmen vera şarê ma qirkerdişanê fîzîkî û kulturelan keno. Ganî ciwanê Vakurê Kurdîstanî vera nê kerdişan gerîlayan de yew bibê.''