TJK-E Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' 2yê êlule de, bi kampanyaya 'Tîrêjên Rojê' kirişte safhayêka newîye. Kampanyaya 'Tîrêjên Rojê' vizêr şaristanê Cenevre yê Swîsre de, verê Ofîsê Neteweyanê Yewbîyayeyan (NY) de ameye îlankerdene.

Cinîyan tewirê Komîteya Vergirewtişê Îşkenceyî (CPT), Konseya Ewropa û Parlamentoyê Ewropa yê vera tecrîdî bi pankartan teşhîr kerd. Eşkerayîye ra verî seba Gulîstane Tara û Hêro Bahadîn ameyî yadkerdene.

Nameyê YJK-Syî ser o Hêlîne Saglam eşkerayîya çapemenîye wende. Hêlîne pare kerd ke Rayberê Şarê Kurdî Abdullah Ocalan 25 serran ra zêdeyêr o binê tecrîdî de yo. Hêlîne îfade kerd ke azadîya Abdullah Ocalanî seba çareserîya meseleya kurdan û aramîya dinya zaf girîng a.

Hêlîne venga CPT, Konseya Ewropa, Parlamentoyê Ewropa, NYyî û pêro dezgehanê Ewropa da ke wa tedaya dewleta tirke bikerê ke qanûnan bîyarê ca û tecrîdî wedarnê.

Eşkerayîye ra dima Vervatoxa YJK-Syî Selma Surer derheqê kampanyaya 'Tîrêjên Rojê' de agahîyî dayî. Selma da zanayene ke kampanya do heta 12ê teşrîna verêne dewam bikera û venga pêro kurdîstanijan da ke wa wayîrê kampanya vejîyê.