Çapemenîya Cinîyan a Rojawanî pê beşdarîya 86 delegeyan konferansê xo yê 3. kerd. Dêrikî ra heta Dêrazorî, Reqa ra heta Minbic û Kobanê, Kobanê ra Şehba û Helebçe bi desan rojnamegerê cinîyî tewrê konferansî bîyî.

Konferanso 3. pê şîarê ''Çapemenîya cinîyan vengê neteweyê demokratîkî yo'' 28ê hezîrane de şaristanê Qamişloyî de ame kerdene. Rojawanî ra 86 delegeyî beşdarê konferansî bîyî. Posterê Rayberê Şarê Kurdî Abdullah Ocalanî, fotografê kedkaranê çapemenîye yê ke şehîd bîyî û pankartê pê ziwanê erebkî û kurdkî salona konferansî de ameyî daliqnayene. 

Konferans de çêrî û çalakîkerîya rojnamegeranê Merkezê Çapemenîye yê YPJyî rojdem de bîyî. Endamê Çapemenîya YPJyî bi hawayêkê aktîfî tewrê konferansî bîyî.

Vervatoxa Çapemenîya YPJyî Sozê Qamişlo derheqê çapemenîya YPJyî de ajansê ma reyde qisey kerd û vat: ''No konferans mojneno ke ma ewro resayî asta senîne. Çapemenî raştî, rayberî, heqîqat a. Çapemenîye eşkena şorişan bikera. Ma sey çapemenîya YPJyî seba ke raştîyan bimojnê,  hêrişanê ke vera cinîyan yenê kerdene pê objektîf û qelema xo pûç bikerê eke hewce bibo canê xo danê. Ma tîya de reyna soz danê ke ma do xebata xo pê cewher û raştîye bi hawayêkê zelalî biresnê pêro dinya.''

Endamanê Merkezê Çapemenîye yê YPJyî ra Arase Masûm zî vat: ''Ez hêvî kena ke perspektîfê nê konferansî do bibê bingeyê kar û gureyê ma. Çapemenîya azade de vengê cinîyan esas o. Ma eşkenê pê çapemenîye sîstemê xo yê alternatîfî Şorişê Rojawanî pêro dinya rê bidê şinasnayene. Seba resnayîşê na raştî ma do heya peyêne rêçê şehîdanê xo Agirî, Dilîşan, Rohenda û Dilovanan de şorê.''