Têgêrayîşê Cinîyan ê Azadan (TJA) bi plansazîya seba çar mengan Amed de Kampanyaya 'Ma do xo bipawê' daye destpêkerdene. Cinîyî do Vakurê Kurdîstanî û Tirkîya de vera hêrişanê ekonomîk, psîkolojîk, cînsî û nîjadperestan kargehan serûber bikerê.

Vervatoxa TJA Ayşe Gokkan  derheqê kampanya de ANFyî reyde qisey kerd.

Ayşe Gokkan ard ziwan ke dewlete dest nayo erd, koy, zengînîyanê Kurdîstanî ser û vat: ''Nê kerdişê pêro cinîyan kenê xizan, bêkar verdenê û cinîyî kenê hewcedarê dewlete. Dima nê cinîyî seba karî şinê Tirkîya la uca de zî benê hedefê hêrişan ê nîjadperestan. Vera naye ma do ekonomîya xo awan bikerê, vera hîşmendîya kolonyalîste têbihêrê, xo bipawê. Bêguman babetanê tewr giranan ra yew zî nîjadperestî û pederşahîya vera cinîyan a. Selahîyetdarê dewlete yê biunîforma sey Musa Orhan vanê 'Mi kerd, çew to ra bawer nêkeno.' Na polîtîkaya şerê taybetî ya. Vera naye ganî ma xo bipawê.''

Ayşe Gokkan mîsalê sey Gulîstane Doku, Dîlane, Buşra yê Dêrsim, Wan û Agirî dayî û vat: ''Dewlete peyê camêrdanê xo de ya. Camêrdî tecawuzê cinîyan kenê, vêşnenê û beton erzenê cinîyan ser. Dewlete niha hukmato newe yo. Rejîmê AKP-MHPyî rejîmê dewlete yo. Coka ê vera Peymana Îstanbulî vejîyenê.''

Vervatoxa TJA Ayşe Gokkan vist vîrî ke Amed de înan dest pê kampanyaya xo kerd û vat: ''Şaristanê dormeyî zî tewrê kampanya benê la her şaristan goreyê şert û mercanê xo kampanya keno. Ma do çarçewa kampanya de kargehan bikerê. Ma do goreyê her şaristanî bernameyan bikerê. Ma do goreyê her şaristanî bernameyan amade bikerê. Vera qirkerdişê cinîyan, vera tecrîdî ma do kargehan bikerê û nîqaşan bikerê. ''

Ayşe Gokkan îfade kerd ke cinîyê kurdî hîrê qat zêdêr hedefê hêrişan benê û vat: ''Neteweyanê Yewbîyayeyan vato ke Tirkîya Efrîn de sûcê vera merdimîye kerdî. Êyê ke teberê sînorî de wina kenê zereyê welatê xo de her çi kenê. Ma binê F-16an de xo pawenê. No pawitiş asan nîyo. Zîndanî vurîyayî kampanê cinîyan. Dewlete dest nana destkewteyanê ma ser. Na kampanya do bina kampanyaya xopawitişî.Vera her tewirê hêrişî ma do xo bipawê''