Bado ke dewleta tirke Efrin, Girê Sipî û Serêkanîyê îşxal kerdî herême de binpaykerdişê heqê merdiman zêdîyayî. Bitaybetî şîdetê serê cinîyan her roje zafer beno. Porsesê îşxalî de vera cinîyan sûcê merdimîye yenê kerdene. Goreyê Merkezê Cigêrayîş û Pawitişê Heqanê Cinîyan ê Rojawanî îşxalê Efrîn, Girê Sipî û Serêkanîyê de hetê ewro 164 cinîyî ameyî qetilkerdene, 275 cinîyî ameyî remnayene û 246 cinîyî birîndar bîyî.

Endama Komîteya Demokratîke ya Tekîlî û Îtîfaqî ya Kongra Starî Rîhane Temo derheqê caardişanê vera cinîyan ê ke herêmanê binê îşxalê dewleta tirke de ANFyî rê qisey kerd.

Rihane Demo ard ziwan ke seba ke Şorişê Rojawanî serkêşîya cinîyan de ame kerdene herêmanê binê îşxalê dewleta tirke de vera cinîyan îşkenceyo sîstematîk yeno kerdene û nê vatî: ''Prosesê Wisarê Ereban de welatanê bînan ra cîya cuyeya demokratîke ameye înşakerdene. Zîhnîyetê camêrdê serdestî cinîyan ê azad û serkêşan sey tehtîdî vîneno herêmanê ke îşxal kerdî tîya de nê cinîyan hedef geno. Nê caardişê vera cinîyan vera îradeyê cinîyan qirkerdiş  o û sûcê vera merdimîye yo.

Waranê îşxalkerdeyan de cinîyî raştê tehdîtê tecawuzî, remnayîş, serranê qijan de zewaj û mergî yenê. Nê caardişê metodanê şerî ra dahîna giran ê. Vera azadîya cinîyan polîtîkaya şerê taybetî yena rayraberdene. Dewleta tirke û çeteyê ci bitaybetî vera cinîyan ê Efrînî şîdetê sîstematîkî kenê. Xozaya Efrînî yena talankerdene. Serêkanîyê de zî bi bedilnayîşê demografîkî vera kultur, nasname û estbîyayîşê cinîyan hêriş yeno kerdene.

Cinîyan ke Rojawan de têkoşîn kerd hetê çeteyan ra yenê hedefgirewtene. Rojhilatê Kurdîstanî de cinîyê ke tewrê şorişê Jin Jîyan Azadî bîyî ê zî şîdet vînenî û yenê îdamkerdene la dezgehê eleqedarî yê mîyanneteweyî bêveng ê. Dezgehê heqanê merdiman û mehkemeyê mîyanneteweyî herinda nê sûcan sey sûcê merdimîye pênaskerdişî de seba ke têkoşîn û xoverdayîşê cinîyan sey tehdîtî vînenî bêveng menanê. Ganî cinîyî xopawitişê xo xurtêr bikerî. Cinîyê ke binê zextî de yê xo kişenê û problemanê psîkolojîkî yê giranan ciwîyenê. Coka ganî waranê binê îşxalî de ganî rêxistinbîyayîşê cinîyan û xopawitiş bêro xurtêrkerdene.''