Waran de ke binê îşxalê dewleta tirke û cerganê ci de yê vera cinîyan hêrişê bêexalqî dewam kenê. Cinîyê Efrînî di serr ê ke rastê kerdişanê binpakerdişê dewleta tirke yenê. Tecawuz, tacîz, remnayîş û qetilkerdişê dewleta tirke yê vera cinîyan bi hawayêkê sîstematîkî û bêmabênî dewam kenê.

Heman kerdişê dewleta tirke yê vera cinîyan Girê Sipî û Serêkanîyê de yenê meydan. Her çiqas nê kerdişê dewleta tirke hetê dezgehanê mîyanneteweyan ra bi dokumentan ameyî îsbatkerdene zî dezgehêk zî vera dewleta tirke tênêgêra.

Goreyê Rêxistina Heqanê Merdiman a Efrînî Efrîn de 56 cinîyî û 46 domanî hetê dewleta tirke ra ameyî remnayene û qetilkerene. 100 cinîyî zî birîndar bîyî.

Rêxistine eşkera kerd ke se ra 30 binpaykerdişê heqan vera cinîyan yenê kerdene û înan ra zafêrî zî  kênayê domanî yê. Reyna goreyê raporî cinîyê ke yenê remnayene yenê qetilkerdene.

Goreyê raporê  Rêxistina Heqanê Merdiman a Efrînî 50 cinîyî bi hawayêkê cîy-cîyayî ameyî qetilkerdene û 60 cinîyan rê zî hêrişê cînsî ameyî kerdene.

Cinîyê ke ameyî remnayene aqibetê tayê înan nêno zanayene. Goreyê raporî semedê psîkolojîkî û komelkî ra 3 serebutê xokiştişî zî ameyî meydan.

Cinîya koçebere ya efrînije ya bi nameyê Cunevîyane Mihemed îfade kerd ke hêrişê vera cinîyan dewam kenê. Cinîyêka bi nameyê Sîhame Abdurehman zî venga dezgehanê huqûqî yê mîyanneteweyîyan da û vat: ''Dewletê Ewropa, dezgehê cinîyan, rêxistinê heqanê merdiman hê ça de yê?''

Girê Sipî de zî bi hawayêkê zorî cinîyan ra yeo waştene ke çarşef xo ra bidê.

Goreyê doneyanê ANHA yê ke çimeyanê herêmîyan ê Serêkanîyê ra ameyî girewtene, Serêkanîyê de 5 cinîyê çeçenî, 2 cinîyê kurdî û 23 cinîyê erebî maruzê hêrişanê cinsîyan ê dewleta tirke û cerganê ci bîyî.

Goreyê doneyanê Îdarekara Rêxistina Heqanê Merdiman a Herêma Cizîrî Evîn Cuma zî 6 cinîyî maruzê hêrişê cinsî mendî.

Endama  Rêxistina Heqanê Merdiman a Efrînî Heyhane Alî vat: ''Vera cinîyan hêrişê psîkolojîkî, fîzîkî û fekkî estê. Yeno qedexekerdene ke cinîyî bivejîyê teber û bi zorî yeno waştene ke cinîyî çarşefê sîyayî xo ra bidê. Dewleta tirke û cergê ci zor danê ke kênayê efrînijî bizewijê. Nê pêro vera merdimîye û huqûqê mîyanneteweyî yê. Ganî nînan ra hesab bêro perskerdene. Şermêko pîl o ke rayaumûmîya mîyanneteweyîye vera nînan bêveng a.''