Vizêr Endama KJARî Werişê Muradîya ke Zîndanê Evîne de tepişîyena seba ke bira îdamî ya vera Pexşane Ezîzî û Şerîfe Muhamedî protetso bikera nêvejîyaye verê mehkeme.

Heyetê mehkeme nêverda ke avûkatî pawitişî bikerê û roniştişê dewa qedîna.

Werişe cinîyan û şarî rê mektubêke şawite û tede pare kerd ke a seba ke biranê îdamî protesto kena nêvejîyaya verê mehkeme.

Werişe mektube de da zanayene ke dima ke aye fikrê Rayberê Şarê Kurdî Abdullah Ocalanî şinasnayê bîya endama Komelê Cinîyan ê Azadan ê Rojhelatê Kurdîstanî (KJAR). Werişe bale ante têkoşînê vera DAÎŞî ser û vat ke vera ferasetê kanwazî aye tim ferasetê 'Jin, Jiyan, Azadî' ser o têkoşîn kerd.

Werişe îfade kerd ke seba ke înan Rojawan de vera DAÎŞî têkoşîn kerdo ê kewtê lîsteya mergî ya îstîxbaratê dewleta tirke (MÎT). 

Werişe vat: ''1ê tebaxa 2023yî de rayîrê Senendecî-Kamyaranî de hetê îstîxbaratê Îranî ra tepişîyaya. Mi bi rojan her tewirê îşkence dî. Dime ez sewqê Zîndanê Evîne bîya û tîya de zî îtîrafkerîye bi îşkenceyan mi rê ameye ferzkerdene. Mi rê ame perskerdene ke 'Çira şima têkoşînê vera DAÎŞî û têkoşînê vera Komara Îslamî ya Îranî' yew vînenê?' Çunke DAÎŞî sereyê ma birnayêne û dewleta Îranî zî ma darde kena. 

Teyna mi hîrê mengî keyeyê xo dî, dima ez tim binê tecrîdî de menda. Ez endamanê DAÎŞî reyde yew hucre de tepişîyaya. Ez peyê pêro çalakîyan û xebatanê xo de ya. Mi qetî zerar nêda gan û malê çewî. Ez hema zî têkoşînê xo yê vera DAÎŞî pawena. Heta ke zulmê vera cinîyan biqedo û îdelê 'Jin, Jiyan, Azadî' bêrê caardene ez do têkoşîn bikera.

Ez cinîyêka kurd a le Rojhelatê Mîyanênî de ciwîyena û ez heta ke destê mi ra yeno seba azadîya cinî û şaran her çî bikera. Çunke oxirê cuya azade û rûmetêne de çew eşkeno bimiro. Cuye ganî bi hawayêkê manadar û rûmetênî bêra xemilnayene.''