4ê temmuze de cezaya îdamî dîyaye Şerîfe Muhammed û 23ê temmuze de cezaya îdamî dîyaye  pawitoxa heqanê cinîyan û rojnamegera kurde Pexşane Ezîzî. Wird aktîvîstê cinîyî zî bi hewteyan nezarat de raştê îşkeceyanê giranan û caardişanê teberê merdimîye ameyî.

Koordînasyonê KJKyî bi eşkerayîye ard ziwan ke bi îdaman têkoşînê cinîyan nîno vindarnayene û veng da dezgehanê mîyanneteweyî û têgêrayîşanê cinîyan ke vera nê dewleta dişmenê cinîyan têkoşîn bêro xurtkerdene.

Eşkerayîya KJKyî ra qismêk wina yo: ''Cinîyan ê Îran û Rojhelatê Kurdîstanî serra 2022yî de bi slogana Jin, Jiyan Azadî têkoşînê xo yê estbîyayîş, nasname û azadîye vet werte.  Ma sey têgêraîşê cinîyan ê kurdan tim vanê  'Seserra Cinîyan-Şorişê Cinîyan' Nê prosesî de ma dî ke no vatişê ma têna qale de nêmendo, pratîk de yeno caardene. Xora Şorişê Cinîyan ê Rojawanî zî îlham da cinîyan ê dinya. Ewro cinîyî her hetê dinya de vera qirkerkerdişê cinîyan, koletîye, raştîya dewlete ya nêrî têkoşîn kenê. Cinîyî bi slogana Jin Jiyan Azadî vengê xo berz kenê û zor danê sîstemê nêrî. Raştîya cinîyan ke serdestan tersnena hêvî dana têkoşînê şaran.

Rejîmê Îranî derheqê aktîvîsta cinî Pexşane Ezizi de qerarê îdamî girewt. Cezaya îdamî ya ke dîyaye aktîvîstanê heqanê cinîyan ê rojhilatijan Pexşane Ezîzî û Şerîfe Muhammedî yena manaya xorîkerdişê kaosî. Çîyê ke benê sebebê serewedaritişê cinîyan semedê cuyeya merdiman sey awe û hewayî muhîm ê. Ewro xeylêk cayanê dinya de têkoşînê cinîyan bi hewayêkê qerardarî aver şino. Cinîyê ke tewrê çalakîyanê Jin Jiyan Azadî bîyî rejîmê Îranî yo dişmenê cinîyan înan rê îşkence keno û cezayanê giranan dano înan ke înan ra qesas bîgêro.

Cinîyan  cayo ke tede  tewr zaf îşkence est o de heme keştîyî vêşnayî û vejîyayî waran. Cinîyê kurdan vera faşîzmê dewleta tirke, Talîban û Îranî û rejîmanê ke dişmenê cinîyan ê têkoşînê biheybetî kenê. Ma polîtîkayanê dimenê cinîyan red kenê. Rejîmê Îranî yo dişmenê cinîyan o keno ke bi îdaman verê têkoşînê cinîyan bîgêro la îdamî nêeşkenê nê têkoşînî vindarnê. No hesabo xelet do bi têkoşînê şaran û cinîyan peyser bêro agêrayene. Zextî têkoşînê cinîyan dahîna kenê radîkal. Cinîyan ê kurdan îspat kerd ke bedelê ci çi beno wa bibo ê do têkoşînê xo bidomnê. Coka ma veng danê rejîmê îranî yê dişmenê cinîyan ke wa nê caardişanê zextî caverdê. Ganî no qerarê îdamî bêro vindarnayene û waştişê cinîyan ê heqdarî bêrê caardene. Ma veng danê dezgehanê mîyanneteweyî, hetanê demokratîkî, têgêrayîşanê cinîyan, dormeyanê demokratîkî  ke wa vera rejîmê Îranî yê dişmenê cinîyan têkoşîn bêro xurtkerdene.''