Koordînasyonê PAJK’î bi wesîleya serrgêra 37’ine ya xoverdayîşê Rojeyê Mergî yê Pîlî yê 14’ê Temmuze eşkerayîyêk weşanaye û vat, “Adirê Newroze yo ke hetê Mazlûm Doganî ra ame tafînayene bi adirê Çaran şên bi û bi çalakîya hemrayanê ma yê ke bedenê xo da verê vêşanîye mucadeleyê ma yê azadîye zîndanî ra resa koyî.”

Eşkerayîya nûştekîye ya Koordînasyonê PAJK’î de ame vatene, “Serrgêra 37’ine ya Xoverdayîşê Rojeyê Mergî yê Pîlî yê 14’ê Temmuze de şexsê Kemal Pîr, Hayrî Dûrmûş, Alî Çîçek û Akîf Yilmazî de ma heme şehîdanê xo yê bêmergan bi hurmet û minet bi vîr anê, çalakîyanê înanê ke bi xoverdayîşî rayîrê serkewtişî ramot silam kenê. Xeta xoverdayîşî ke şopa Kemalan de bi Leyla Guvenan dewam kerde, hemverê heman dewleta TC’yî ya faşîste, qirkerdox, înkarkerdox û kiştoxe de grevanê vêşanîye serkewtişê îradeyî îlan kerd. No îrade o îrade yo ke do azadîya Rayberê ma bica bîyaro, faşîzmo birijno û cuya azade biaferno.

Artêşa TC’yî ya faşîste ke bi îşxalkerdişê Başûrê Kurdistanî hêrişê yewîye û estbîyayîşê neteweyîyî yê Kurdan kena û şorişgêro serkêş û qehreman ê nê şarî hemra Helmet qetil kerd, neçar a ke koyanê Başûrê Kurdistanî de bin kewo. Sere de cinîyê Kurdî yê Başûrê Kurdistanî ma veng danê cinîyan ê azadîperweran ê ke çar perçeyanê Kurdistanî de mucadele kenê yewîya neteweyîye ya cinîyan ê Kurdan biafernê û hemverê kolonyalîst û îşxalkaran de her wareyî açarnê wareyê xoverdayîşî. Seba bicaardişê serkêşîya yewîya neteweyîye ya Kurdan ma veng danê. Ma veng danê hêzanê welatperwer, şorişgêr û demokratîkan zî ke hemverê faşîzmî de bi mucadeleyêkê hîna radîkalî û bi ruhê 14’ê Temmuze her wareyî de xover bidê.

Şarê ma û cinîyê ke wayîrê qerardarîya serkewtişê xeta xoverdayîşî û mucadeleyê azadîye yê ganî bi ruhê 14’ê Temmuze hurzê payan ser, Başûrê Kurdistanî de hemverê îşxalî de, Vakurê Kurdistanî û pêroyîya Kurdistanî de zî hemverê qirkerdiş û kerdişanê serdestîya camêrdî de sere wedarê. Dem demê azadî û cinî yo. Azadîya cinî bi xeta xoverdayîşî ya ruhê PKK-PAJK’î vejîyaya werte. Ma şehîdanê xo yê pîlan bi hurmet û minet bi vîr anê û vanê ke bi vîrameyîşê înan ma do azadîya Rayberê xo bica bîyarê û şorişê cinî qetîyen biafernê.”